ന്യൂറാലിങ്കിന്റെ ബ്രെയിൻ ചിപ്പ് തന്റെ ജീവിതം പൂർണ്ണമായും മാറ്റിമറിച്ചെന്ന് ചിപ്പ് സ്വീകരിച്ച ആദ്യ വ്യക്തിയായ നോലൻഡ് ആർബോ. ശസ്ത്രക്രിയയ്ക്ക് ശേഷം ഒരു പുതിയ ജീവിതം ലഭിച്ചുവെന്നും അത് തനിക്ക് സ്വാതന്ത്ര്യവും ആത്മബന്ധങ്ങളും തിരികെ നൽകിയെന്നും അദ്ദേഹം പറയുന്നു. “എന്റെ ശരീരത്തെ ചലിപ്പിക്കാൻ എനിക്ക് കഴിയില്ല, പക്ഷേ എന്റെ മനസ്സിനെ ചലിപ്പിക്കാൻ എനിക്ക് കഴിയും” എന്ന് അദ്ദേഹം കൂട്ടിച്ചേർത്തു.
2016-ൽ ഡൈവിങ്ങിനിടെയുണ്ടായ അപകടത്തിൽ തോളിന് താഴേക്ക് തളർന്നുപോയ വ്യക്തിയാണ് ആർബോ. 2024-ന്റെ തുടക്കത്തിൽ ന്യൂറാലിങ്കിന്റെ ബ്രെയിൻ-കംപ്യൂട്ടർ ഇംപ്ലാന്റ് (BCI) സ്വീകരിക്കുന്ന ആദ്യ വ്യക്തിയായി അദ്ദേഹം മാറി. വീൽചെയറിൽ വെച്ചാണ് കഴിഞ്ഞ 18 മാസത്തിനുള്ളിൽ നടന്ന ഈ പരീക്ഷണം തന്റെ ജീവിതം എങ്ങനെ മാറ്റിമറിച്ചുവെന്ന് ആർബോ വിശദീകരിച്ചത്.
തലച്ചോറിൽ ചിപ്പ് ഘടിപ്പിച്ചതിന് ശേഷം ആർബോയ്ക്ക് ഇപ്പോൾ ചിന്തകൾ ഉപയോഗിച്ച് കമ്പ്യൂട്ടർ നിയന്ത്രിക്കാനും ചെസ് കളിക്കാനും ഇന്റർനെറ്റ് ബ്രൗസ് ചെയ്യാനും സാധിക്കുന്നുണ്ട്. ഇത് ന്യൂറാലിങ്കിനെ സംബന്ധിച്ചിടത്തോളം വലിയൊരു വിജയമായിട്ടാണ് കണക്കാക്കപ്പെടുന്നത്.
രണ്ട് മണിക്കൂറിൽ താഴെ മാത്രം സമയമെടുത്താണ് റോബോട്ടിക് സംവിധാനം ഉപയോഗിച്ച് ചിപ്പ് ആർബോയുടെ തലച്ചോറിൽ സ്ഥാപിച്ചത്. നാണയത്തിന്റെ വലിപ്പമുള്ള ഈ ചിപ്പ് തലച്ചോറിൻ്റെ ചലനങ്ങളെ നിയന്ത്രിക്കുന്ന ഭാഗമായ മോട്ടോർ കോർട്ടെക്സിലെ ന്യൂറോണുകളിലേക്ക് ഘടിപ്പിച്ചു. ഈ ഉപകരണം തലച്ചോറിൻ്റെ പ്രവർത്തനങ്ങളെ ഡിജിറ്റൽ കമാൻഡുകളാക്കി മാറ്റുന്നു.
ഈ ചിപ്പ് ഉപയോഗിച്ച് കമ്പ്യൂട്ടർ കഴ്സർ നീക്കാനും ഇന്റർനെറ്റ് ബ്രൗസ് ചെയ്യാനും ഗെയിമുകൾ കളിക്കാനും വീട്ടുപകരണങ്ങൾ നിയന്ത്രിക്കാനും ആർബോയ്ക്ക് സാധിക്കുന്നു. ദിവസവും ഏകദേശം 10 മണിക്കൂർ അദ്ദേഹം ഈ ഉപകരണം ഉപയോഗിക്കുന്നുണ്ടെന്നും റിപ്പോർട്ടുകൾ പറയുന്നു. യുഎസ്, കാനഡ, ബ്രിട്ടൻ, യുഎഇ എന്നിവിടങ്ങളിൽ നിന്നായി എട്ടുപേർ കൂടി നിലവിൽ ന്യൂറാലിങ്കിന്റെ മനുഷ്യരിലെ പരീക്ഷണങ്ങളിൽ പങ്കാളികളായിട്ടുണ്ട്.
Elon Musk’s brain chip, Neuralink ‘Participant 1’ Noland Arbaugh says his whole life has changed
