ഒട്ടാവ: പാർക്കിങ് നിയമങ്ങൾ ലംഘിക്കുന്നവർക്കെതിരെ കടുത്ത നടപടിയുമായി ഒട്ടാവ നഗരസഭ. ബൈലോ ഓഫീസർമാർ പ്രതിദിനം നൂറുകണക്കിന് പാർക്കിങ് ടിക്കറ്റുകളാണ് നൽകുന്നത്. ഇത് നഗരത്തിന്റെ വരുമാനത്തിൽ വലിയ വർധനവുണ്ടാക്കി. 2025-ന്റെ ആദ്യ ആറ് മാസങ്ങളിൽ എമർജൻസി ആൻഡ് പ്രൊട്ടക്റ്റീവ് സർവീസസ് വകുപ്പ് 10 ലക്ഷം ഡോളറിന്റെ മിച്ച വരുമാനമുണ്ടാക്കിയതായി സെപ്റ്റംബർ 2-ന് ചേർന്ന ധനകാര്യ സമിതി യോഗത്തിൽ സമർപ്പിച്ച റിപ്പോർട്ടിൽ പറയുന്നു. പ്രതീക്ഷിച്ചതിലും ഉയർന്ന പാർക്കിങ് പിഴകൾ, ഒഴിവുകൾ കാരണം ശമ്പളയിനത്തിൽ വന്ന കുറവ്, സേവനങ്ങളുടെ ചെലവ് മാറ്റിവെച്ചത് എന്നിവയാണ് ഈ മിച്ച വരുമാനത്തിന് കാരണം.
ഈ വർഷം ജനുവരി മുതൽ ജൂൺ വരെയുള്ള കാലയളവിൽ ബൈലോ ഓഫീസർമാർ 1,79,246 പാർക്കിങ് ടിക്കറ്റുകൾ നൽകി. കഴിഞ്ഞ വർഷം ഇതേ കാലയളവിൽ ഇത് 1,51,246 ആയിരുന്നു. പാർക്കിങ് നിയമലംഘനങ്ങളെക്കുറിച്ച് 25,951 സേവന അഭ്യർത്ഥനകളാണ് നഗരസഭയ്ക്ക് ഈ വർഷം ലഭിച്ചത്. ഇത് മുൻവർഷത്തെക്കാൾ കൂടുതലാണ്.
പാർക്കിങ് ടിക്കറ്റുകളിൽ നിന്നുള്ള വരുമാനം ടിക്കറ്റുകളുടെ എണ്ണത്തെ മാത്രമല്ല, എത്ര ടിക്കറ്റുകൾ മുഴുവൻ തുകയും അല്ലെങ്കിൽ ലേറ്റ് ഫീയും അടച്ച് തീർപ്പാക്കുന്നു എന്നതിനെയും ആശ്രയിച്ചിരിക്കുന്നുവെന്ന് ബൈലോ ആൻഡ് റെഗുലേറ്ററി സർവീസസ് ഡയറക്ടർ റോജർ ചാപ്മാൻ പറഞ്ഞു.
വർധിച്ചുവരുന്ന ജനസംഖ്യ, സേവന അഭ്യർത്ഥനകളിലെ വർധനവ്, കനത്ത മഞ്ഞുവീഴ്ചയെ തുടർന്നുണ്ടായ പാർക്കിങ് വിലക്കുകൾ എന്നിവ ടിക്കറ്റുകളുടെ എണ്ണം വർധിക്കാൻ കാരണമായി എന്നും അദ്ദേഹം വ്യക്തമാക്കി. പാർക്കിങ് നിയമലംഘനങ്ങളുടെ പിഴ 60 ഡോളർ മുതൽ 130 ഡോളർ വരെയാണ്. നേരത്തെ അടയ്ക്കുന്നവർക്ക് ഇളവുകൾ ലഭ്യമാണ്. നഗരത്തിലെ സുരക്ഷ, ഗതാഗത ക്രമം എന്നിവ ഉറപ്പാക്കാൻ നിയമലംഘനങ്ങൾക്കെതിരെയുള്ള നടപടികൾ തുടരുമെന്ന് ചാപ്മാൻ കൂട്ടിച്ചേർത്തു.
2024-ൽ ആകെ 4,52,202 പാർക്കിങ് ടിക്കറ്റുകളാണ് ഒട്ടാവയിൽ നൽകിയത്. 2023-ൽ ഇത് 2,98,918-ഉം 2022-ൽ 3,40,625-ഉം ആയിരുന്നു.
ഈ വർഷം ഫെബ്രുവരി, മാർച്ച് മാസങ്ങളിൽ മഞ്ഞുവീഴ്ചയെ തുടർന്നുണ്ടായ പാർക്കിങ് നിരോധനങ്ങളെത്തുടർന്ന് 16,053 ടിക്കറ്റുകളാണ് ബൈലോ ഓഫീസർമാർ നൽകിയത്. ഇതിലൂടെ 1.685 മില്യൺ ഡോളർ വരുമാനം ലഭിച്ചു. മഞ്ഞുകാലത്തെ പാർക്കിങ് നിയമലംഘനത്തിനുള്ള പിഴ 125 ഡോളറാണ്. നേരത്തെ അടയ്ക്കുകയാണെങ്കിൽ 105 ഡോളറായി കുറയും. വിവിധ നിയമലംഘനങ്ങളുടെ അടിസ്ഥാനത്തിലുള്ള ടിക്കറ്റുകളുടെ എണ്ണം നഗരസഭ പുറത്തുവിട്ടിട്ടില്ല.
എങ്കിലും സൈൻബോർഡുകൾ ഇല്ലാത്ത തെരുവുകളിൽ അനുവദിച്ചതിലും കൂടുതൽ സമയം പാർക്ക് ചെയ്തതിന് ഈ വർഷം 20,010 ടിക്കറ്റുകൾ നൽകിയതായി ബൈലോ സർവീസസ് ഉദ്യോഗസ്ഥർ സിടിവി ന്യൂസിനോട് പറഞ്ഞു. ഇതിന്റെ പിഴ 70 ഡോളറാണ്. നേരത്തെ അടച്ചാൽ 50 ഡോളറായി കുറയും. മേയ് മാസത്തിൽ നടന്ന കനേഡിയൻ ട്യൂലിപ് ഫെസ്റ്റിവലിന്റെ ഭാഗമായി 1,416 ടിക്കറ്റുകളാണ് ഡോസ് ലേക്കിനും ലിറ്റിൽ ഇറ്റലിക്കും ചുറ്റുമുള്ള സ്ഥലങ്ങളിൽ പാർക്ക് ചെയ്ത വാഹനങ്ങൾക്ക് നൽകിയത്.
