റജീന: യുക്രെയ്ൻ സ്വാതന്ത്ര്യത്തിന്റെ മുപ്പത്തിനാലാം വാർഷികം കാനഡയിലെ സാസ്കച്ചെവൻ പ്രവിശ്യയിലെ യുക്രേനിയൻ സമൂഹം ആഘോഷിച്ചു. ഓഗസ്റ്റ് 24 ഞായറാഴ്ച റജീനയിൽ നടന്ന ചടങ്ങിൽ നൂറുകണക്കിന് യുക്രേനിയൻ വംശജർ പങ്കെടുത്തു. നിലവിലെ യുദ്ധ പശ്ചാത്തലത്തിൽ ഈ വർഷത്തെ ആഘോഷങ്ങൾക്ക് പ്രാധാന്യം കൂടുതലായിരുന്നു. 1991-ൽ സോവിയറ്റ് യൂണിയന്റെ തകർച്ചയെത്തുടർന്നാണ് യുക്രെയ്ൻ സ്വാതന്ത്ര്യം പ്രഖ്യാപിച്ചത്. എന്നാൽ മൂന്ന് വർഷത്തിലേറെയായി റഷ്യ-യുക്രെയ്ൻ യുദ്ധം തുടരുകയാണ്.
റജീനയിലെ വസ്കാന പാർക്കിൽ നടന്ന ചടങ്ങിൽ ഏകദേശം 300 പേരാണ് പങ്കെടുത്തത്. യുക്രെയ്നിന്റെ ദേശീയ പതാകയേന്തിയുള്ള വാഹനങ്ങളുടെ നീണ്ട ഘോഷയാത്രക്ക് ശേഷമാണ് ഇവർ ഒത്തുകൂടിയത്. അന്താരാഷ്ട്ര തലത്തിൽ യുക്രെയ്ൻ ഒരു സ്വതന്ത്ര രാജ്യമാണെന്ന് അംഗീകരിക്കപ്പെടേണ്ടത് വളരെ പ്രധാനമാണെന്ന് യുക്രേനിയൻ കനേഡിയൻ കോൺഗ്രസ് ഓഫ് സാസ്കച്ചെവൻ അംഗമായ സ്വെറ്റ്ലാന കെന്യ്യൂക്ക് പറഞ്ഞു.
തങ്ങളുടെ സ്വാതന്ത്ര്യത്തിന് വേണ്ടി യുക്രേനിയക്കാർ എന്നും പോരാടിയിട്ടുണ്ടെന്നും 1991-ൽ അവർക്ക് സ്വാതന്ത്ര്യം ലഭിച്ചപ്പോൾ ഭാഷ, പാരമ്പര്യങ്ങൾ, ആചാരങ്ങൾ എന്നിവ സംരക്ഷിക്കാൻ സാധിച്ചെന്നും അവർ കൂട്ടിച്ചേർത്തു. റജീനയിലെ ലെജിസ്ലേറ്റീവ് ഗ്രൗണ്ടിനടുത്തുള്ള ലേക്ക്ഷോർ ഡ്രൈവിലുള്ള ഹോളോഡോമോർ പ്രതിമയ്ക്ക് മുന്നിലാണ് ഘോഷയാത്ര സമാപിച്ചത്. “ചെറുപ്പകാലത്തിലെ കയ്പേറിയ ഓർമ്മകൾ” എന്ന് പേരിട്ടിട്ടുള്ള ഈ പ്രതിമ, 1932-33 കാലഘട്ടത്തിൽ ലക്ഷക്കണക്കിന് യുക്രേനിയക്കാരും കൊസാക്കുകളും മരണപ്പെട്ട കൃത്രിമ ക്ഷാമത്തെ (Holodomor) അനുസ്മരിപ്പിക്കുന്നതാണ്.
ഈ പ്രതിമയുടെ യഥാർത്ഥ മാതൃക ഉക്രെയ്നിലെ കൈവിലുള്ള നാഷണൽ ഹോളോഡോമോർ മ്യൂസിയത്തിന് പുറത്ത് സ്ഥാപിച്ചിട്ടുണ്ട്. റഷ്യൻ അധിനിവേശത്തെ തുടർന്ന് പലായനം ചെയ്തവരാണ് ഞായറാഴ്ചത്തെ പരിപാടിയിൽ പങ്കെടുത്തവരിൽ പകുതിയോളം പേരും. യുക്രേനിയൻ സമൂഹത്തിന്റെ ഐക്യദാർഢ്യം ലോകത്തിന് മുന്നിൽ വീണ്ടും തെളിയിക്കുന്നതായിരുന്നു ഈ ആഘോഷം. സെപ്റ്റംബർ 7-ന് സാസ്കച്ചെവൻ പ്രവിശ്യയിൽ രണ്ടാമത് യുക്രേനിയൻ ഹെറിറ്റേജ് ഡേ ആഘോഷിക്കാൻ ഒരുങ്ങുകയാണ്.
