യെമന്റെ തലസ്ഥാനമായ സനായിൽ ഇസ്രായേൽ വ്യോമാക്രമണം. ഹൂത്തി വിമതർ ഭരിക്കുന്ന ആരോഗ്യ മന്ത്രാലയം പുറത്തുവിട്ട കണക്കുകൾ പ്രകാരം രണ്ട് പേർ കൊല്ലപ്പെടുകയും 35 പേർക്ക് പരിക്കേൽക്കുകയും ചെയ്തു. ഹൂത്തി വിമതർക്ക് ഇസ്രായേലുമായി നേരിട്ടുള്ള സംഘർഷങ്ങളില്ലെങ്കിലും, ഗാസയിലെ യുദ്ധത്തിൽ പലസ്തീൻ ജനതയ്ക്ക് പിന്തുണ പ്രഖ്യാപിച്ച് അവർ ഇസ്രായേലിന് നേരെ മിസൈലുകളും ഡ്രോണുകളും അയച്ചിരുന്നു. കഴിഞ്ഞ ദിവസം ഇസ്രായേലിന്റെ ബെൻ ഗുറിയോൺ വിമാനത്താവളത്തിന് നേരെയും ആക്രമണം നടന്നതിന് പിന്നാലെയാണ് യെമനിൽ വ്യോമാക്രമണം ഉണ്ടായിരിക്കുന്നത്.
ഹൂത്തി നിയന്ത്രിത അൽ-മസീറ ടെലിവിഷൻ ചാനൽ റിപ്പോർട്ട് ചെയ്തത് ഒരു എണ്ണക്കമ്പനിക്ക് നേരെയാണ് ആക്രമണം നടന്നതെന്നാണ്. അതേസമയം, ഹൂത്തി സൈനിക ആവശ്യങ്ങൾക്കായി ഉപയോഗിക്കുന്ന അസർ, ഹിസാസ് വൈദ്യുത നിലയങ്ങളും പ്രസിഡൻഷ്യൽ കൊട്ടാരത്തിന് സമീപമുള്ള സൈനിക കേന്ദ്രങ്ങളും ആക്രമിച്ചതായി ഇസ്രായേൽ സൈന്യം പ്രസ്താവനയിലൂടെ അറിയിച്ചു. സ്ഫോടനശബ്ദം വളരെ ശക്തമായിരുന്നെന്നും സമീപത്തെ വീടുകളിലെ ജനലുകൾ തകർന്നുവെന്നും ദൃക്സാക്ഷികൾ പറയുന്നു.
കഴിഞ്ഞ 22 മാസങ്ങളായി ഹൂത്തികൾ ഇസ്രായേലിലേക്ക് മിസൈലുകളും ഡ്രോണുകളും അയച്ചുകൊണ്ട് ഗാസയിലെ യുദ്ധത്തിന് തങ്ങളുടെ പ്രതിഷേധം രേഖപ്പെടുത്തുകയാണ്. ഹൂത്തി മാധ്യമ വിഭാഗം ഡെപ്യൂട്ടി മേധാവി നസറുദ്ദീൻ ആമിർ, ഇസ്രായേലിന്റെ ആക്രമണങ്ങൾ തങ്ങളെ തളർത്തില്ലെന്ന് പ്രഖ്യാപിച്ചു. “ഗാസയ്ക്ക് വേണ്ടിയുള്ള ഞങ്ങളുടെ സൈനിക നീക്കങ്ങൾ തുടരും. ഗാസയിലെ ആക്രമണം അവസാനിക്കുകയും ഉപരോധം നീക്കുകയും ചെയ്യുന്നതുവരെ ഞങ്ങളുടെ പോരാട്ടം തുടരും”, അദ്ദേഹം സോഷ്യൽ മീഡിയയിൽ കുറിച്ചു. യെമൻ ഉൾപ്പെടെയുള്ള രാജ്യങ്ങളിലെ വിമത ഗ്രൂപ്പുകൾക്ക് ആയുധങ്ങളും സാങ്കേതിക സഹായങ്ങളും നൽകുന്നത് ഇറാനാണെന്ന് ഇസ്രായേൽ ആരോപിച്ചു.
ഈജിപ്ത്, സൗദി അറേബ്യ, യുഎഇ തുടങ്ങിയ ഗൾഫ് രാജ്യങ്ങളിലേക്കും വ്യാപാരക്കപ്പലുകൾക്ക് നേരെയും ഹൂത്തികൾ ആക്രമണം നടത്തിയിരുന്നു. ഗാസയിലെ വെടിനിർത്തലിന് ശേഷം യു.എസ്. പ്രസിഡന്റ് ഡൊണാൾഡ് ട്രംപ് ഹൂത്തികൾക്കെതിരെ വ്യോമാക്രമണം നടത്താൻ ഉത്തരവിട്ടിരുന്നു. ഇത് പിന്നീട് അവസാനിക്കുകയും, കപ്പൽ ആക്രമണങ്ങൾ അവസാനിപ്പിക്കാമെന്ന് ഹൂത്തികൾ യു.എസുമായി കരാറിലേർപ്പെടുകയും ചെയ്തു. എന്നാൽ ഇസ്രായേൽ അനുകൂല കപ്പലുകൾക്കെതിരെ ആക്രമണം തുടരുമെന്ന് ഹൂത്തികൾ വ്യക്തമാക്കിയിരുന്നു.
Solidarity with Gaza: Israeli airstrike in Yemen, 2 killed
