ഇന്ത്യയിൽ നിലവിലുള്ള ചരക്ക് സേവന നികുതി (ജി എസ് ടി) ഘടനയിൽ വിപുലമായ മാറ്റങ്ങൾ വരുത്താനൊരുങ്ങി കേന്ദ്ര സർക്കാർ. 79-ാം സ്വാതന്ത്ര്യദിന പ്രസംഗത്തിനിടെയാണ് പ്രധാനമന്ത്രി നരേന്ദ്രമോദി പുതുതലമുറ ജി എസ് ടി പരിഷ്കരണം പ്രഖ്യാപിച്ചത്. ദീപാവലിക്ക് മുൻപ് തന്നെ പരിഷ്കാരങ്ങൾ പ്രാബല്യത്തിൽ വരുത്താനുള്ള ശ്രമത്തിലാണ് കേന്ദ്രം. സാധനങ്ങളുടെയും സേവനങ്ങളുടെയും വില വർധനവ് നിയന്ത്രിക്കാനും സാധാരണക്കാർക്ക് കൂടുതൽ ആശ്വാസം നൽകാനും ലക്ഷ്യമിട്ടാണ് ഈ പരിഷ്കാരങ്ങൾ. ജി എസ് ടി കൗൺസിൽ യോഗത്തിൽ 12 ശതമാനം നികുതി സ്ലാബ് ഒഴിവാക്കി പകരം അഞ്ച് ശതമാനവും 18 ശതമാനവും സ്ലാബുകൾക്ക് പ്രാധാന്യം നൽകിയേക്കുമെന്നാണ് റിപ്പോർട്ടുകൾ. ഇത് പല ഉത്പന്നങ്ങളുടെയും വില കുറയ്ക്കാൻ സഹായിക്കുമെന്നാണ് പ്രതീക്ഷ.
നിലവിൽ അഞ്ച്, 12, 18, 28 ശതമാനം എന്നിങ്ങനെ നാല് പ്രധാന ജി എസ് ടി സ്ലാബുകളാണ് രാജ്യത്തുള്ളത്. ഇതിൽ 12 ശതമാനം സ്ലാബിൽ ഉൾപ്പെടുന്ന ഉത്പന്നങ്ങൾ വിലകുറഞ്ഞ അഞ്ച് ശതമാനം സ്ലാബിലേക്കോ അല്ലെങ്കിൽ ഉയർന്ന 18 ശതമാനം സ്ലാബിലേക്കോ മാറ്റുന്നതിനെക്കുറിച്ചുള്ള ചർച്ചകൾ സജീവമാണ്. ഇത് ജി എസ് ടി ഘടന കൂടുതൽ ലളിതവും കാര്യക്ഷമവുമാക്കുമെന്നാണ് വിദഗ്ദ്ധർ ചൂണ്ടിക്കാട്ടുന്നത്. പലപ്പോഴും ഒരു ഉത്പന്നത്തിന് ഏത് സ്ലാബ് ബാധകമാക്കണം എന്നതിനെക്കുറിച്ചുള്ള ആശയക്കുഴപ്പങ്ങൾ പരിഹരിക്കാൻ ഈ മാറ്റങ്ങൾ സഹായകമാകും.
ജി എസ് ടി പരിഷ്കാരങ്ങൾ നടപ്പാക്കുമ്പോൾ, ചില ഉത്പന്നങ്ങൾക്ക് നേരിയ വിലവർധനവ് ഉണ്ടായേക്കാമെങ്കിലും, വലിയൊരു വിഭാഗം സാധനങ്ങളുടെയും സേവനങ്ങളുടെയും വില കുറയാനാണ് സാധ്യത. ഇത് പണപ്പെരുപ്പം നിയന്ത്രിക്കാനും ജനങ്ങളുടെ വാങ്ങൽ ശേഷി വർദ്ധിപ്പിക്കാനും സഹായിക്കും. സാധാരണക്കാർക്ക് നേരിട്ട് പ്രയോജനപ്പെടുന്ന നിരവധി ഉത്പന്നങ്ങൾ കുറഞ്ഞ നിരക്കിലേക്ക് മാറ്റുന്നത് സാമ്പത്തിക വളർച്ചയ്ക്ക് പുതിയ ഉണർവ് നൽകും. സാമ്പത്തിക വിദഗ്ദ്ധരും വ്യവസായികളും ഈ നീക്കത്തെ ഏറെ പ്രതീക്ഷയോടെയാണ് നോക്കിക്കാണുന്നത്.
Narendra Modi announces major changes in GST, prices will go down
