വാട്ടർലൂ റീജിയൺ കൗൺസിലിലേക്ക് പുതിയ അംഗം; കൗൺസിലർ കാരി വില്യംസിന്റെ പിൻഗാമി ജോസഫ് ഗോവിംഗ്

റീജിയൺ ഓഫ് വാട്ടർലൂ കൗൺസിലർമാരുടെ നിരയിലേക്ക് പുതിയൊരാൾ കൂടി എത്തുന്നു. കൗൺസിലർ കാരി വില്യംസിന്റെ നിര്യാണത്തെ തുടർന്ന് ഒഴിവുവന്ന സ്ഥാനത്തേക്ക് ജോസഫ് ഗോവിംഗിനെ നിയമന പ്രക്രിയയിലൂടെ കൗൺസിലർമാർ തിരഞ്ഞെടുത്തു.

പുതിയൊരാളെ തിരഞ്ഞെടുക്കാൻ ഉപതിരഞ്ഞെടുപ്പ് നടത്താതെ കൗൺസിൽ നിയമന പ്രക്രിയ തിരഞ്ഞെടുക്കുകയായിരുന്നു.താൽപ്പര്യമുള്ളവർക്ക് ഓഗസ്റ്റ് 4-നകം അപേക്ഷിക്കാൻ അവസരം നൽകിയിരുന്നു. മൊത്തം 44 പേരാണ് അപേക്ഷിച്ചത്. അപേക്ഷകർക്ക് അവരുടെ നിലപാട് വ്യക്തമാക്കുന്നതിന് വേണ്ടി കൗൺസിലിന് മുന്നിൽ സംസാരിക്കാൻ അവസരം നൽകി. ഏകദേശം നാല് മണിക്കൂറോളമാണ് ഈ പ്രക്രിയ നീണ്ടുനിന്നത്.

മൂന്ന് റൗണ്ട് വോട്ടെടുപ്പിന് ശേഷമാണ് ഗോവിംഗിനെ ഈ സ്ഥാനത്തേക്ക് നിയമിക്കാൻ കൗൺസിൽ തീരുമാനിച്ചത്. അടുത്ത ഏതാനും ദിവസങ്ങൾക്കുള്ളിൽ അദ്ദേഹം സത്യപ്രതിജ്ഞ ചെയ്യും. ഓഗസ്റ്റ് 27-നായിരിക്കും അദ്ദേഹത്തിന്റെ ആദ്യ കൗൺസിൽ യോഗം. കിച്ചണർ നിവാസിയാണ് ജോ ഗോവിംഗ്. കഴിഞ്ഞ 15 വർഷമായി കാംബ്രിഡ്ജിലും കിച്ചണറിലുമായിട്ടാണ് അദ്ദേഹം താമസിക്കുന്നത്.

വാട്ടർലൂ കാത്തലിക് ഡിസ്ട്രിക്റ്റ് സ്കൂൾ ബോർഡിലെ ട്രസ്റ്റിയായും അദ്ദേഹം സേവനമനുഷ്ഠിച്ചിട്ടുണ്ട്. പോളിസ് ഫൗണ്ടേഷൻസ്, ബിസിനസ് മാനേജ്‌മെൻ്റ് എന്നിവ കോണസ്റ്റോഗ കോളേജിൽ നിന്ന് പഠിച്ച അദ്ദേഹം 2011 മുതൽ 2014 വരെ ഗോവിംഗ് കൺസ്ട്രക്ഷന്റെ ഉടമയും ജനറൽ കോൺട്രാക്ടറുമായിരുന്നു. അതിനുശേഷം ബാങ്ക് ഓഫ് മോൺട്രിയൽ, മെറിഡിയൻ ക്രെഡിറ്റ് യൂണിയൻ, ടിഡി കാനഡ ട്രസ്റ്റ് എന്നിവയുൾപ്പെടെ നിരവധി ധനകാര്യ സ്ഥാപനങ്ങളിൽ മോർട്ട്ഗേജ് സ്പെഷ്യലിസ്റ്റായും അദ്ദേഹം പ്രവർത്തിച്ചിട്ടുണ്ട്.

നിലവിൽ പിഎഫ്എസ്എൽ ഇൻവെസ്റ്റ്‌മെൻ്റ്‌സിലെ ഡിസ്ട്രിക്റ്റ് ലീഡറാണ്. കൂടാതെ, റോയൽ കനേഡിയൻ ലെജിയൻ ബ്രാഞ്ച് 125-ൻ്റെ പ്രസിഡന്റായും നിലവിൽ റോയൽ കനേഡിയൻ ലെജിയൻ സോൺ C2-ലെ ഡെപ്യൂട്ടി സോൺ കമാൻഡറായും അദ്ദേഹം പ്രവർത്തിക്കുന്നു. 2022-ൽ റീജിയണൽ കൗൺസിലിലേക്ക് മത്സരിച്ചെങ്കിലും പരാജയപ്പെട്ടിരുന്നു.

പുതിയ കൗൺസിലറായി തിരഞ്ഞെടുക്കപ്പെട്ടതിൽ തനിക്ക് സന്തോഷമുണ്ടെന്ന് ഗോവിംഗ് പറഞ്ഞു. “ഞാൻ നിങ്ങളെപ്പോലെയുള്ള ഒരു സാധാരണക്കാരനാണ്. നിങ്ങൾക്ക് എന്തെങ്കിലും സഹായം ആവശ്യമുള്ളപ്പോൾ എന്നെ വിളിക്കാം,” അദ്ദേഹം പറഞ്ഞു. ധനകാര്യത്തിലുള്ള തന്റെ പരിചയം കൗൺസിൽ ചർച്ചകളിൽ ഒരു പ്രധാന മുതൽക്കൂട്ടാകുമെന്നും അദ്ദേഹം പ്രതീക്ഷ പ്രകടിപ്പിച്ചു. ഭവനരഹിതരുടെ പ്രശ്നങ്ങളിലും ബജറ്റ് കാര്യങ്ങളിലും തന്റെ ശ്രദ്ധയുണ്ടാകുമെന്നും അദ്ദേഹം കൂട്ടിച്ചേർത്തു.

New member to Waterloo Region Council; Joseph Gowing succeeds Councillor Carrie Williams