ഒന്റാരിയോയുടെ കാലാവസ്ഥാ പദ്ധതി ഡിസംബറിൽ വീണ്ടും ഭരണഘടനാപരമായ പരിശോധനയ്ക്ക് വിധേയമാകും. ഒരു കൂട്ടം യുവ കാലാവസ്ഥാ പ്രവർത്തകർ നൽകിയ ചരിത്രപരമായ ഭരണഘടനാപരമായ കേസ് ഡിസംബർ 1, 2 തീയതികളിൽ ഒന്റാരിയോ സുപ്പീരിയർ കോടതിയിൽ വീണ്ടും പരിഗണിക്കും. കേസ് സംബന്ധിച്ച് ഇടപെടണമെന്ന പ്രവിശ്യയുടെ ആവശ്യം കാനഡയിലെ പരമോന്നത കോടതി തള്ളിയതിന് പിന്നാലെയാണ് ഈ പുതിയ വാദം. 2018-ൽ ഒന്റാരിയോ സർക്കാർ തങ്ങളുടെ കാലാവസ്ഥാ ലക്ഷ്യങ്ങൾ ദുർബലമാക്കിയത് ഗ്രീൻഹൗസ് വാതകങ്ങളുടെ അളവ് അപകടകരമായ നിലയിലേക്ക് ഉയർത്താൻ കാരണമായെന്ന് യുവ കാലാവസ്ഥാ പ്രവർത്തകരുടെ അഭിഭാഷകർ വാദിച്ചു.
ഇത് ഭരണഘടന ഉറപ്പുനൽകുന്ന അവരുടെ അവകാശങ്ങളുടെ ലംഘനമാണെന്നാണ് പ്രധാന ആരോപണം. 2022-ൽ നടന്ന ആദ്യ വാദത്തിന് ശേഷം, ഒന്റാരിയോ സുപ്പീരിയർ കോടതി ജഡ്ജി സർക്കാരിന്റെ കാലാവസ്ഥാ ലക്ഷ്യം ശാസ്ത്രീയപരമായ നിലപാടുകളേക്കാൾ ‘വളരെ ദുർബലമാണ്’ എന്ന് സമ്മതിച്ചിരുന്നു. എങ്കിലും, അത് ഭരണഘടനയുടെ ലംഘനമല്ലെന്ന് കോടതി അന്ന് വിധിച്ചു.
എന്നാൽ ഈ വിധിക്കെതിരെ അപ്പീൽ നൽകിയപ്പോൾ ഒന്റാരിയോയുടെ ഹൈക്കോടതി യുവ കാലാവസ്ഥാ പ്രവർത്തകർക്ക് അനുകൂലമായ വിധി പുറപ്പെടുവിക്കുകയും കേസ് വീണ്ടും പരിഗണിക്കാൻ കീഴ്ക്കോടതിയിലേക്ക് തിരിച്ചയക്കുകയും ചെയ്തു.
ഡിസംബറിലെ പുതിയ വാദം കേൾക്കുന്നതിനായി കാത്തിരിക്കുകയാണ് പരിസ്ഥിതി പ്രവർത്തകർ. ഈ കേസ് കാനഡയിലെ കാലാവസ്ഥാ നയങ്ങൾക്ക് ഒരു പുതിയ ദിശാബോധം നൽകുമെന്നാണ് അവരുടെ പ്രതീക്ഷ.
