രജനികാന്തിനെ നായകനാക്കി ലോകേഷ് കനകരാജ് സംവിധാനം ചെയ്ത ‘കൂലി’ എന്ന ചിത്രം കേരളത്തിലെ ബോക്സ് ഓഫീസ് റെക്കോർഡുകൾ ഭേദിക്കാൻ സാധ്യതയുണ്ടെന്ന് സൂചന നൽകി അഡ്വാൻസ് ബുക്കിംഗ് കണക്കുകൾ. മോഹൻലാലിന്റെ ‘എമ്പുരാൻ’, വിജയ് ചിത്രം ‘ലിയോ’ എന്നിവയുടെ ആദ്യദിന അഡ്വാൻസ് ബുക്കിംഗിനെ അപേക്ഷിച്ച് മികച്ച പ്രകടനമാണ് ‘കൂലി’ക്ക് ലഭിച്ചത്. ഇന്നലെ രാവിലെ 10 മണിക്കാണ് കൂലിയുടെ കേരളത്തിലെ അഡ്വാൻസ് ബുക്കിംഗ് ആരംഭിച്ചത്.
ആദ്യ മണിക്കൂറുകളിൽത്തന്നെ മികച്ച പ്രതികരണമാണ് ചിത്രത്തിന് ലഭിച്ചത്. ആദ്യദിനം രാത്രി 12 മണിവരെയുള്ള കണക്കുകൾ പ്രകാരം 4.11 കോടി രൂപയാണ് ‘കൂലി’ നേടിയത്. കേരളത്തിൽ ഓപ്പണിംഗ് റെക്കോർഡ് നേടിയ ‘എമ്പുരാൻ’, ‘ലിയോ’ എന്നീ ചിത്രങ്ങളുടെ ആദ്യദിന അഡ്വാൻസ് ബുക്കിംഗ് കണക്കുകളുമായി താരതമ്യം ചെയ്യുമ്പോൾ ഇത് ഒരു വലിയ സംഖ്യയാണ്.
ട്രാക്കർമാരുടെ കണക്കനുസരിച്ച്, മോഹൻലാൽ ചിത്രം ‘എമ്പുരാൻ’ ആദ്യദിനം 8.14 കോടി രൂപയും, ലോകേഷ് കനകരാജിന്റെ തന്നെ വിജയ് ചിത്രം ‘ലിയോ’ 5.86 കോടി രൂപയുമാണ് നേടിയത്. ‘ലൂസിഫറി’ന്റെ രണ്ടാം ഭാഗമെന്ന ഹൈപ്പും, ലോകേഷ് കനകരാജ് സിനിമാറ്റിക് യൂണിവേഴ്സിന്റെ ഭാഗമെന്ന ആകർഷകതയുമായിരുന്നു ഈ ചിത്രങ്ങൾക്ക് വലിയ സ്വീകാര്യത നേടിക്കൊടുത്തത്.
അതേസമയം, ‘എമ്പുരാൻ’ റിലീസ് ദിവസം കേരളത്തിൽ നിന്ന് ആകെ 14 കോടി രൂപയും ‘ലിയോ’ 12 കോടി രൂപയും നേടിയിരുന്നു. കൂലിയുടെ റിലീസിന് ഇനിയും അഞ്ചു ദിവസങ്ങൾ അവശേഷിക്കുന്നതിനാൽ അവസാന അഡ്വാൻസ് ബുക്കിംഗ് കളക്ഷൻ എത്രയായിരിക്കുമെന്ന് നിലവിൽ പ്രവചിക്കാൻ കഴിയില്ല.
പുലർച്ചെ 6 മണിക്ക് ആരംഭിക്കുന്ന ആദ്യ ഷോകൾക്ക് മികച്ച പ്രതികരണം ലഭിക്കുകയാണെങ്കിൽ കൂലിക്ക് വൻ ഇനിഷ്യൽ കളക്ഷൻ നേടാനാകുമെന്നതിൽ സംശയമില്ല. രജനികാന്ത് എന്ന താരമൂല്യവും, വിക്രം, ലിയോ എന്നീ ഹിറ്റുകൾക്ക് ശേഷമുള്ള ലോകേഷ് ചിത്രം എന്നതും കൂലിക്ക് കൂടുതൽ പ്രേക്ഷകരെ തിയേറ്ററുകളിലേക്ക് എത്തിക്കാൻ സഹായിക്കും.
