വാഷിങ്ടൺ: ഇന്ത്യൻ ഉൽപ്പന്നങ്ങൾക്ക് 50% താരിഫ് ഏർപ്പെടുത്തിയതിന് പിന്നാലെ, റഷ്യൻ എണ്ണ ഇറക്കുമതി തുടർന്നാൽ കൂടുതൽ ഉപരോധങ്ങൾ ഏർപ്പെടുത്തുമെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ് വീണ്ടും ഭീഷണി മുഴക്കി. ഇന്ത്യൻ ചരക്കുകൾക്ക് 25% അധിക താരിഫ് ചുമത്തുന്ന എക്സിക്യൂട്ടീവ് ഉത്തരവിൽ ഒപ്പുവെച്ചതിന് പിന്നാലെയാണ് ട്രംപിന്റെ ഈ പ്രസ്താവന. റഷ്യയെ ലക്ഷ്യമിട്ടുള്ള ഉപരോധങ്ങൾ ലംഘിക്കുന്ന രാജ്യങ്ങൾക്കെതിരെ ചുമത്തുന്ന അനുബന്ധ ഉപരോധങ്ങളെക്കുറിച്ചാണ് ട്രംപ് മുന്നറിയിപ്പ് നൽകിയത്.
റഷ്യയും യുക്രെയ്നും തമ്മിലുള്ള യുദ്ധത്തിന് ധന സഹായം നൽകുന്നത് റഷ്യൻ എണ്ണ ഇറക്കുമതിയിലൂടെയാണെന്ന് ആരോപിച്ചാണ് ട്രംപിന്റെ നടപടികൾ. ഓഗസ്റ്റ് ഒന്നിന് പ്രഖ്യാപിച്ച 25% പകര ചുങ്കവും, പുതിയതായി പ്രഖ്യാപിച്ച 25% അധിക താരിഫും ചേരുമ്പോൾ ഇന്ത്യൻ ചരക്കുകൾക്ക് യു.എസ് ചുമത്തുന്ന ആകെ താരിഫ് 50 ശതമാനമായി ഉയരും. റഷ്യൻ എണ്ണ ഇറക്കുമതിയുടെ കാര്യത്തിൽ ഒരു സമവായത്തിലെത്താൻ 21 ദിവസത്തെ സമയവും ഇന്ത്യക്ക് നൽകിയിട്ടുണ്ട്.
ചൈനയെപ്പോലുള്ള രാജ്യങ്ങളും റഷ്യൻ എണ്ണ ഇറക്കുമതി തുടരുമ്പോൾ ഇന്ത്യയെ മാത്രം ലക്ഷ്യമിടുന്നത് എന്തുകൊണ്ടാണെന്ന മാധ്യമ പ്രവർത്തകരുടെ ചോദ്യത്തിന്, “നിങ്ങൾക്ക് ഇനിയും ഒരുപാട് കാര്യങ്ങൾ കാണാനുണ്ട്” എന്നായിരുന്നു ട്രംപിന്റെ മറുപടി. കൂടുതൽ അനുബന്ധമായ ഉപരോധങ്ങൾ ഉണ്ടാകുമെന്നും അദ്ദേഹം സൂചിപ്പിച്ചു.
അതേസമയം, ട്രംപിന്റെ ഈ തീരുമാനത്തെ ഇന്ത്യ കടുത്ത ഭാഷയിൽ വിമർശിച്ചു. കമ്പോള ഘടകങ്ങളും 140 കോടി ജനങ്ങളുടെ ഊർജ്ജ സുരക്ഷയും മുൻനിർത്തിയാണ് ഇന്ത്യ റഷ്യയിൽ നിന്ന് എണ്ണ ഇറക്കുമതി ചെയ്യുന്നതെന്നും, ഈ തീരുമാനം നീതീകരിക്കാനാവാത്തതും അന്യായവുമാണെന്നും വിദേശകാര്യ മന്ത്രാലയം പ്രസ്താവിച്ചു.
റഷ്യ-യുക്രെയ്ൻ സമാധാന കരാർ ഉണ്ടാകുകയാണെങ്കിൽ താരിഫുകൾ പിൻവലിക്കുമോ എന്ന ചോദ്യത്തിന്, അക്കാര്യം പിന്നീട് തീരുമാനിക്കും എന്നായിരുന്നു ട്രംപിന്റെ മറുപടി. ട്രംപിന്റെ ഈ നിലപാടുകൾ ഇന്ത്യ-യു.എസ് വ്യാപാര ബന്ധത്തിൽ കൂടുതൽ സങ്കീർണ്ണതകൾ സൃഷ്ടിക്കാൻ സാധ്യതയുണ്ട്. അന്താരാഷ്ട്ര ഊർജ്ജ വിപണിയിലെ നിലവിലെ സാഹചര്യം പരിഗണിച്ച് ഇന്ത്യ റഷ്യൻ എണ്ണ ഇറക്കുമതി തുടർന്നാൽ, അത് യു.എസ്-ഇന്ത്യ ബന്ധത്തിൽ കൂടുതൽ വിള്ളലുകൾ ഉണ്ടാക്കാനും സാധ്യതയുണ്ട്.
