ഭാഷ മുഖ്യം! കാനഡയിൽ ഓപ്പൺ വർക്ക് പെർമിറ്റിന് ഭാഷാ പരീക്ഷ നിർബന്ധം; പുതിയ നിയമം അടുത്ത വർഷം

2026 മുതൽ ഓപ്പൺ വർക്ക് പെർമിറ്റിന് അപേക്ഷിക്കുന്നവർക്ക് ഇംഗ്ലീഷ് അല്ലെങ്കിൽ ഫ്രഞ്ച് ഭാഷാ പ്രാവീണ്യം നിർബന്ധമാക്കാനൊരുങ്ങി കാനഡ. കാനഡയിലെ ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC) ആണ് ഇന്റർനാഷണൽ മൊബിലിറ്റി പ്രോഗ്രാമിന്റെ (IMP) ഭാഗമായി ഈ സുപ്രധാന മാറ്റത്തിന് നിർദ്ദേശം വെച്ചിരിക്കുന്നത്.

ഈ പുതിയ നിയമം താത്കാലിക തൊഴിലാളികൾക്ക്, പ്രത്യേകിച്ച് സ്പൗസൽ ഓപ്പൺ വർക്ക് പെർമിറ്റിനായി (SOWP) അപേക്ഷിക്കുന്നവർക്ക് നിർണായകമാകും. ഭാഷാ പരീക്ഷ നിർബന്ധമാക്കുന്നതിലൂടെ തൊഴിൽ മേഖലയിലെ സംയോജനം മെച്ചപ്പെടുത്താനും, കരാർ വിവാഹം പോലുള്ള ചൂഷണങ്ങൾ തടയാനും, മികച്ച ആശയവിനിമയ ശേഷിയുള്ള തൊഴിലാളികളെ രാജ്യത്തേക്ക് ആകർഷിക്കാനും സാധിക്കുമെന്ന് IRCC കരുതുന്നു.

എന്തൊക്കെയാണ് മാറ്റങ്ങൾ?

ചില IMP ഓപ്പൺ വർക്ക് പെർമിറ്റ് അപേക്ഷകർക്ക് ഭാഷാ പ്രാവീണ്യം തെളിയിക്കുന്നതിനുള്ള പരീക്ഷാ ഫലം സമർപ്പിക്കേണ്ടി വരും.IELTS, CELPIP, TEF കാനഡ, TCF കാനഡ തുടങ്ങിയ അംഗീകൃത പരീക്ഷകളാണ് ഇതിനായി ഉപയോഗിക്കുക. വായിക്കാനും, എഴുതാനും, മനസ്സിലാക്കാനും, സംസാരിക്കാനുമുള്ള കഴിവുകൾ വിലയിരുത്തും. ഈ പരീക്ഷാ ഫലങ്ങൾ കനേഡിയൻ ലാംഗ്വേജ് ബെഞ്ച്മാർക്ക് (CLB) അല്ലെങ്കിൽ Niveaux de compétence linguistique canadiens (NCLC) നിലവാരത്തിന് അനുസരിച്ചായിരിക്കും. സാധാരണ ജോലികൾക്ക് CLB 5-ഉം വിദഗ്ദ്ധ ജോലികൾക്ക് CLB 7-ഉം ആയിരിക്കും നിലവാരമെന്ന് പ്രതീക്ഷിക്കുന്നു, എങ്കിലും IRCC ഔദ്യോഗികമായി ഇത് സ്ഥിരീകരിച്ചിട്ടില്ല. പരീക്ഷാ ഫലങ്ങൾക്ക് രണ്ട് വർഷത്തെ കാലാവധിയായിരിക്കും ഉണ്ടാവുക.

ഏതൊക്കെ പ്രോഗ്രാമുകളെ ഇത് ബാധിക്കും?

സ്പൗസൽ ഓപ്പൺ വർക്ക് പെർമിറ്റ് (SOWP): നിലവിൽ ഭാഷാ പരീക്ഷയിൽ നിന്ന് ഒഴിവാക്കിയിട്ടുണ്ടെങ്കിലും, യഥാർത്ഥ അപേക്ഷകരെ ഉറപ്പുവരുത്തുന്നതിനും തൊഴിൽ മേഖലയുമായി എളുപ്പം സംയോജിപ്പിക്കുന്നതിനും ഇത് നിർബന്ധമാക്കാൻ സാധ്യതയുണ്ട്.

ഇന്റർനാഷണൽ എക്സ്പീരിയൻസ് കാനഡ (IEC): ഇത് ബാധിക്കാൻ സാധ്യതയില്ല, കാരണം ഇത് രാജ്യങ്ങൾ തമ്മിലുള്ള പരസ്പര ധാരണയുടെ അടിസ്ഥാനത്തിലുള്ളതാണ്.

പോസ്റ്റ്-ഗ്രാജുവേഷൻ വർക്ക് പെർമിറ്റ് (PGWP): കാനഡയിൽ പഠനം പൂർത്തിയാക്കിയ വിദ്യാർത്ഥികളെ ഇത് സഹായിക്കും.

ബ്രിഡ്ജിംഗ് ഓപ്പൺ വർക്ക് പെർമിറ്റ് (BOWP): സ്ഥിരതാമസത്തിന് അപേക്ഷിക്കുന്നവർക്ക് നിലവിൽ തന്നെ ഭാഷാ പ്രാവീണ്യം ആവശ്യമായതിനാൽ ഇത് ബാധിക്കാൻ സാധ്യതയില്ല.

ഇൻട്രാ-കമ്പനി ട്രാൻസ്ഫറീസ്, സിഗ്നിഫിക്കന്റ് ബെനിഫിറ്റ് കാറ്റഗറികൾ, ഫ്രീ ട്രേഡ് അഗ്രിമെന്റ് പ്രൊഫഷണലുകൾ, ചാരിറ്റബിൾ അല്ലെങ്കിൽ റിലീജിയസ് വർക്ക്: ഈ വിഭാഗങ്ങളെയും പുതിയ നിയമം ബാധിക്കില്ലെന്നാണ് പ്രതീക്ഷിക്കുന്നത്.

പുതിയ മാറ്റം എപ്പോൾ പ്രാബല്യത്തിൽ വരും?

ഈ നിയമഭേദഗതിയുടെ കരട് ഈ വർഷം പ്രസിദ്ധീകരിക്കാനും, പൊതുജനങ്ങളുടെ അഭിപ്രായങ്ങൾക്കായി 30 ദിവസത്തെ സമയം നൽകാനും IRCC ലക്ഷ്യമിടുന്നു. പിന്നീട് വിവിധ കക്ഷികളുമായി കൂടുതൽ കൂടിയാലോചനകൾ നടത്തും. ഇതിനെല്ലാം ശേഷം 2026-ലോ 2027-ലോ ഈ നിയമം ഔദ്യോഗികമായി പ്രാബല്യത്തിൽ വരുമെന്നാണ് പ്രതീക്ഷിക്കുന്നത്. പുതിയ നിയമം നിലവിൽ വരുന്നതിനു മുൻപ് അപേക്ഷകർ ഭാഷാ പരിശീലനം നേടാനും, IELTS, CELPIP പോലുള്ള പരീക്ഷകൾക്ക് തയ്യാറെടുക്കാനും, അംഗീകൃത ഇമിഗ്രേഷൻ കൺസൾട്ടന്റുമാരുടെ സഹായം തേടാനുമാണ് വിദ​ഗ്ധർ നിർദേശിക്കുന്നത്.

Canada To Require Language Tests For Open Work Permits In 2026