റഷ്യൻ നഗരമായ സോചിയിലെ എണ്ണ സംഭരണശാലയ്ക്ക് നേരെ യുക്രെയ്ൻ ഡ്രോൺ ആക്രമണം. ആക്രമണത്തെ തുടർന്നുണ്ടായ തീപിടുത്തം നിയന്ത്രിക്കാൻ 120-ൽ അധികം അഗ്നിശമന സേനാംഗങ്ങൾ ശ്രമിച്ചുകൊണ്ടിരിക്കുകയാണെന്ന് റീജിയണൽ ഗവർണർ വെനിയാമിൻ കോൺഡ്രാത്യേവ് ടെലിഗ്രാമിൽ അറിയിച്ചു. സോചിയിൽ സ്ഥിതി ചെയ്യുന്ന ക്രാസ്നോദർ റീജിയണിലെ 2,000 ക്യുബിക് മീറ്റർ ശേഷിയുള്ള ഇന്ധന ടാങ്കിനാണ് തീപിടിച്ചതെന്ന് റഷ്യയുടെ റിപ്പോർട്ടുകൾ വ്യക്തമാക്കി.
സുരക്ഷാ കാരണങ്ങൾ മുൻനിർത്തി സോചി വിമാനത്താവളത്തിലെ എല്ലാ സർവ്വീസുകളും താൽക്കാലികമായി നിർത്തിവെച്ചതായി റഷ്യൻ സിവിൽ ഏവിയേഷൻ അതോറിറ്റിയായ റോസാവിയാറ്റ്സിയ ടെലിഗ്രാമിലൂടെ അറിയിച്ചു. അതേസമയം, ആക്രമണത്തെക്കുറിച്ച് യുക്രെയ്ൻ ഇതുവരെ ഔദ്യോഗികമായി പ്രതികരിച്ചിട്ടില്ല.
റഷ്യയുടെ യുദ്ധനീക്കങ്ങൾക്ക് തന്ത്രപ്രധാനമെന്ന് യുക്രെയ്ൻ കരുതുന്ന അടിസ്ഥാന സൗകര്യങ്ങൾക്ക് നേരെ അടുത്തിടെയായി ശക്തമായ ആക്രമണങ്ങളാണ് ഉണ്ടാകുന്നത്. സോചിയിലെ അഡ്ലർ ജില്ലയിലാണ് ഡ്രോൺ ആക്രമണം നടന്നതെന്നാണ് ഗവർണർ അറിയിച്ചത്. കഴിഞ്ഞ മാസം ഇതേ ജില്ലയിൽ യുക്രെയ്ൻ നടത്തിയ ഡ്രോൺ ആക്രമണത്തിൽ ഒരു സ്ത്രീ കൊല്ലപ്പെട്ടിരുന്നു. 2014-ലെ ശീതകാല ഒളിമ്പിക്സിന് ആതിഥേയത്വം വഹിച്ച നഗരമാണ് സോചി.1
കരിങ്കടലിന്റെ തീരത്തുള്ള ക്രാസ്നോദർ മേഖലയിലെ ഏറ്റവും വലിയ എണ്ണ ശുദ്ധീകരണശാലകളിലൊന്നായ ഇൽസ്കി റിഫൈനറി യുക്രെയ്ൻ ഡ്രോൺ ആക്രമണങ്ങളുടെ പതിവ് ലക്ഷ്യമാണ്. ഫെബ്രുവരി 2022-ൽ റഷ്യ യുക്രെയ്നെതിരെ യുദ്ധം ആരംഭിച്ചതിന് ശേഷം ഈ മേഖലയിൽ ഡ്രോൺ ആക്രമണങ്ങൾ അസാധാരണമാണ്.
ഇതിന് പുറമെ, തെക്കൻ റഷ്യയിലെ വൊറോനെഷ് മേഖലയിൽ യുക്രെയ്ൻ നടത്തിയ ഡ്രോൺ ആക്രമണത്തിൽ ഒരു സ്ത്രീക്ക് പരിക്കേറ്റതായും പലയിടത്തും തീപിടുത്തം ഉണ്ടായതായും ഗവർണർ അറിയിച്ചു. അതേസമയം, യുക്രെയ്ൻ തലസ്ഥാനമായ കീവിൽ റഷ്യ മിസൈൽ ആക്രമണം നടത്തിയതായി സൈനിക ഭരണകൂടവും വ്യക്തമാക്കി.
