ടൊറന്റോ: ഹൈവേ 401-ൽ ഡംപ് ട്രക്കും മോട്ടോർസൈക്കിളും കൂട്ടിയിടിച്ച് 59 വയസ്സുകാരൻ മരിച്ചു. ശനിയാഴ്ച രാവിലെയായിരുന്നു സംഭവം. അപകടത്തിൽ മോട്ടോർസൈക്കിൾ യാത്രികനായ ന്യൂമാർക്കറ്റ് സ്വദേശിയാണ് മരിച്ചത്. ഹൈവേ 401-ൽ അലൻ റോഡിന് സമീപം വെസ്റ്റ്ബൗണ്ട് എക്സ്പ്രസ് ലെയ്നിലാണ് അപകടം നടന്നത്.
രാവിലെ എട്ടുമണിയോടെയാണ് ഒന്റാറിയോ പ്രൊവിൻഷ്യൽ പോലീസ് സ്ഥലത്തെത്തിയത്. പോലീസ് നൽകുന്ന വിവരമനുസരിച്ച്, ഡംപ് ട്രക്കിന്റെ ഡ്രൈവ്ഷാഫ്റ്റ് ഊരിത്തെറിച്ചതിന് ശേഷമാണ് മോട്ടോർസൈക്കിളിൽ ഇടിച്ചത്. ഗുരുതരമായി പരിക്കേറ്റ മോട്ടോർസൈക്കിൾ യാത്രികനെ ഉടൻതന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
അപകടത്തിൽ മറ്റ് ആർക്കും പരിക്കേറ്റതായി റിപ്പോർട്ടുകളില്ല. മരിച്ചയാളുടെ ബന്ധുക്കളെ അറിയിച്ച ശേഷം മാത്രമേ പേര് വിവരങ്ങൾ പുറത്തുവിടുമെന്ന് അധികൃതർ അറിയിച്ചു. സംഭവത്തെക്കുറിച്ച് എന്തെങ്കിലും വിവരങ്ങൾ ലഭിക്കുന്നവർ പോലീസുമായി ബന്ധപ്പെടണമെന്ന് അധികൃതർ അഭ്യർത്ഥിച്ചു. ഡംപ് ട്രക്കിന്റെ സാങ്കേതിക തകരാറിനെക്കുറിച്ച് അന്വേഷണം നടക്കുകയാണ്.
അപകടത്തെ തുടർന്ന് ഹൈവേ 401-ലെ വെസ്റ്റ്ബൗണ്ട് എക്സ്പ്രസ് ലെയ്നുകൾ അടച്ചിടുകയും വാഹനങ്ങൾ കളക്ടർ ലെയ്നുകളിലേക്ക് തിരിച്ചുവിടുകയും ചെയ്തു. ഇതേത്തുടർന്ന് പ്രദേശത്ത് വലിയ ഗതാഗതക്കുരുക്ക് അനുഭവപ്പെട്ടു.
Accident on Highway 401; 59-year-old dies tragically
