അമേരിക്കൻ പ്രസിഡന്റ് ഡൊണാൾഡ് ട്രംപ് കനേഡിയൻ ഉൽപ്പന്നങ്ങൾക്ക് 35 ശതമാനം താരിഫ് ഏർപ്പെടുത്തിയതിനെതിരെ ശക്തമായ നിലപാടെടുക്കണമെന്ന് ഒന്റാരിയോ മേയർ ഡ്രൂ ഡിൽക്കൻസ് ആവശ്യപ്പെട്ടു. കാനഡ അമേരിക്കയുടെ ഒരു ‘ജൂനിയർ പങ്കാളി’യല്ലെന്നും, താരിഫ് ഭീഷണിക്കു മുന്നിൽ മുട്ടുമടക്കരുതെന്നും അദ്ദേഹം പറഞ്ഞു. കാനഡയുടെ വാഹന നിർമ്മാണ മേഖലയെ താരിഫ് കാര്യമായി ബാധിക്കുമെങ്കിലും, രാജ്യം ഈ പ്രതിസന്ധി ഘട്ടത്തെ മറികടക്കുമെന്നും അദ്ദേഹം കൂട്ടിച്ചേർത്തു. പ്രധാനമന്ത്രി മാർക്ക് കാർണിയുടെ നിലപാടുകൾക്ക് തൻ്റെ പൂർണ്ണ പിന്തുണയുണ്ടെന്നും ഡിൽക്കൻസ് വ്യക്തമാക്കി.
ട്രംപിന്റെ എക്സിക്യൂട്ടീവ് ഉത്തരവിനെത്തുടർന്ന് കാനഡ-യു.എസ്-മെക്സിക്കോ കരാറിന് കീഴിലുള്ള ഉൽപ്പന്നങ്ങൾക്ക് താരിഫ് ബാധകമല്ലെങ്കിലും, കാനഡയുടെ മറ്റ് പ്രധാന ഉൽപ്പന്നങ്ങളായ തടി, സ്റ്റീൽ, അലുമിനിയം, കാർ എന്നിവയെ ഇത് ഗുരുതരമായി ബാധിക്കുമെന്നാണ് വിലയിരുത്തൽ. കഴിഞ്ഞ രാത്രി പുറത്തിറക്കിയ പ്രസ്താവനയിൽ, വർധിച്ച താരിഫ് നിരക്കിൽ പ്രധാനമന്ത്രി മാർക്ക് കാർണി നിരാശ പ്രകടിപ്പിച്ചിരുന്നു. എന്നിരുന്നാലും, അമേരിക്കൻ താരിഫ് നിരക്കുകൾ കനേഡിയൻ ഉൽപ്പന്നങ്ങൾക്ക് താരതമ്യേന കുറവാണെന്ന് അദ്ദേഹം ചൂണ്ടിക്കാട്ടി.
വിൻഡ്സർ മേഖലയിൽ നിന്ന് രാജ്യത്തിന്റെ വാഹനനിർമാണത്തിന്റെ വലിയൊരു പങ്ക് വരുന്നുണ്ടെന്നും, താരിഫുകൾ ഈ മേഖലയെ വലിയ രീതിയിൽ ബാധിക്കുമെന്നും ഡിൽക്കൻസ് പറഞ്ഞു. സാമ്പത്തികമായി കടുത്ത പ്രതിസന്ധിയിലേക്ക് പോകാൻ ജനങ്ങൾ ആഗ്രഹിക്കുന്നില്ല. എങ്കിലും, ഈ പ്രതിസന്ധിയെ നേരിടാൻ കാനഡയ്ക്ക് കഴിയുമെന്നും, ഭാവിയിൽ മികച്ച രീതിയിൽ മുന്നോട്ട് പോകാൻ സാധിക്കുമെന്നും അദ്ദേഹം പ്രത്യാശ പ്രകടിപ്പിച്ചു. താരിഫ് നിരക്കുകളിലെ തുടർച്ചയായ മാറ്റങ്ങൾ വലിയ അനിശ്ചിതത്വം സൃഷ്ടിക്കുമെന്നും, അത് ജനങ്ങളെ ആശങ്കയിലാഴ്ത്തുമെന്നും അദ്ദേഹം ചൂണ്ടിക്കാട്ടി.
താരിഫുകൾക്ക് കാരണം അമേരിക്കയിൽ ട്രംപിന് രാഷ്ട്രീയ സമ്മർദ്ദം ഏറുന്നുണ്ടെന്നും, അതുകൊണ്ടാണ് അദ്ദേഹം അമേരിക്കക്കാർക്ക് റീബേറ്റ് ചെക്കുകൾ വാഗ്ദാനം ചെയ്യുന്നതെന്നും ഡിൽക്കൻസ് അഭിപ്രായപ്പെട്ടു. മൂന്ന് രാജ്യങ്ങൾക്കും ഗുണകരമാകുന്ന നിലയിലുള്ള ഒരു കരാറിലെത്താൻ സാധിക്കുമെന്നാണ് താൻ കരുതുന്നതെന്നും അദ്ദേഹം പ്രത്യാശ പ്രകടിപ്പിച്ചു. പതിറ്റാണ്ടുകളായി ഇത് മികച്ച രീതിയിൽ പ്രവർത്തിക്കുന്നുണ്ടെന്നും അദ്ദേഹം ഓർമ്മിപ്പിച്ചു.
Don't give in to US tariff threats; Ontario Mayor Drew Dilkens
