ഒന്റാറിയോയിലെ ചാതം നഗരത്തിൽ സ്ഥിതി ചെയ്യുന്ന ഡാജ്കോർ അലുമിനിയം പ്ലാന്റിന്റെ ഗേറ്റുകൾക്ക് മുന്നിൽ ഇന്ന് (വ്യാഴാഴ്ച) പുലർച്ചെ മുതൽ അസാധാരണമായ കാഴ്ചയാണ് കാണാൻ കഴിയുന്നത്.ഏകദേശം 200-ഓളം തൊഴിലാളികൾ പ്ലക്കാർഡുകളും ബാനറുകളുമായി സമര മുദ്രാവാക്യങ്ങൾ വിളിച്ചുകൊണ്ട് പ്ലാന്റിന് മുന്നിൽ പണിമുടക്ക് ആരംഭിച്ചിരിക്കുകയാണ്. കമ്പനി പ്ലാന്റിലെ ഉപകരണങ്ങൾ നീക്കം ചെയ്യാനും പുതിയ തൊഴിലാളികളെ നിയമിക്കാനും ശ്രമിക്കുന്നുവെന്ന യൂണിയൻ ആരോപണത്തെ തുടർന്നാണ് പണിമുടക്ക്. തൊഴിലാളികളുടെ കൂട്ടായ കരാർ ജൂലൈ 27-ന് അവസാനിച്ചതിനു പിന്നാലെയാണ് പണിമുടക്കിന് തുടക്കമായത്.
കമ്പനിയുടെ ‘വഞ്ചനാപരമായ തന്ത്രങ്ങൾ’ ആണ് സമരത്തിന് കാരണമായതെന്ന് തൊഴിലാളികളെ പ്രതിനിധീകരിക്കുന്ന യൂണിയനായ യൂണിഫോർ അറിയിച്ചു. കമ്പനിയുടെ നീക്കങ്ങൾ സ്ഥിതി കൂടുതൽ വഷളാക്കുന്നുവെന്ന് യൂണിഫോർ ദേശീയ പ്രസിഡന്റ് ലാനാ പേയ്ൻ പറഞ്ഞു. തങ്ങളുടെ ജോലിയും പ്ലാന്റും സമൂഹവും സംരക്ഷിക്കാൻ തൊഴിലാളികൾക്ക് അവകാശമുണ്ടെന്നും അവർ കൂട്ടിച്ചേർത്തു.
അതേസമയം, തങ്ങളുടെ ജോലിയുടെ നിലവാരവും പ്ലാന്റിന്റെ ഭാവി സുരക്ഷയും സംരക്ഷിക്കാൻ വേണ്ടിയാണ് പണിമുടക്കുന്നതെന്ന് ലോക്കൽ 127 പ്രസിഡന്റ് ജെഫ് മക്ഫാഡൻ വ്യക്തമാക്കി.
ഓട്ടോമോട്ടീവ്, ഓഫീസ്, മെഡിക്കൽ ഉപകരണ വ്യവസായങ്ങൾക്കായി അലുമിനിയം ഭാഗങ്ങൾ നിർമ്മിക്കുന്ന പ്ലാന്റാണ് ഡാജ്കോർ. 2010-ൽ പ്രവർത്തനം ആരംഭിച്ച ശേഷം കാനഡയിലെയും യു.എസ്സിലെയും ഉപഭോക്താക്കൾക്കായുള്ള അലുമിനിയം ഉത്പന്നങ്ങൾ ഇവിടെ നിർമ്മിച്ചുവരുന്നു.
കമ്പനിക്ക് സർക്കാരിൽ നിന്ന് ഏകദേശം 3.5 മില്യൺ ഡോളർ ധനസഹായം ലഭിച്ചിട്ടുണ്ടെന്ന് യൂണിഫോർ ചൂണ്ടിക്കാട്ടി. ഉത്തരവാദിത്തത്തെക്കുറിച്ചും പ്രാദേശിക തൊഴിലാളികളോടുള്ള പ്രതിബദ്ധതയെക്കുറിച്ചും ഇത് കൂടുതൽ ആശങ്കകൾ സൃഷ്ടിക്കുന്നുവെന്നും അവർ കൂട്ടിച്ചേർത്തു. കമ്പനിക്ക് കെന്റക്കിയിലും ഒരു പ്ലാന്റ് പ്രവർത്തിക്കുന്നതിനാൽ, കാനഡയിൽ നിന്ന് പ്രവർത്തനം മാറ്റുമോ എന്ന ഭയവും തൊഴിലാളികൾക്കുണ്ട്.
തൊഴിലാളികൾ ഇപ്പോഴും പ്ലാന്റിന് മുന്നിൽ പ്രതിഷേധം തുടരുകയാണ്. സുതാര്യമായ ചർച്ചയിലൂടെ തങ്ങളുടെ ജോലിയും പ്ലാന്റിന്റെ ഭാവിയും ഉറപ്പാക്കണമെന്നാണ് അവരുടെ ആവശ്യം.
Dajcor Aluminum Plant workers on strike
