പുടിൻ-സെലെൻസ്കി കൂടിക്കാഴ്ചയ്ക്ക് കളമൊരുങ്ങുന്നു; ഇരുപക്ഷവും ഒത്തുതീർപ്പിന് തയ്യാറാകുമോ?

നീണ്ട രണ്ട് മാസത്തെ ഇടവേളയ്ക്ക് ശേഷം റഷ്യയും യുക്രെയ്നും വീണ്ടും സമാധാന ചർച്ചകൾക്ക് ഒരുങ്ങുകയാണ്. തുർക്കിയിൽ നടക്കുന്ന ഈ കൂടിക്കാഴ്ച, മൂന്നര വർഷത്തിലേറെയായി തുടരുന്ന യുദ്ധത്തിന് അറുതി വരുത്തുമോ എന്ന് ലോകം ഉറ്റുനോക്കുന്നു.യുക്രെനിയൻ പ്രസിഡന്റ് വോലോഡിമിർ സെലെൻസ്കിയും റഷ്യൻ പ്രസിഡന്റ് വ്‌ളാഡിമിർ പുടിനും തമ്മിലുള്ള ഉച്ചകോടിക്ക് കളമൊരുക്കുക എന്ന ലക്ഷ്യം കൂടി ഈ ചർച്ചകൾക്കുണ്ടെന്ന് സെലെൻസ്കി നേരത്തെ വ്യക്തമാക്കിയിരുന്നു. എന്നാൽ, ഈ ചർച്ചകളിൽ വലിയ മുന്നേറ്റമൊന്നും പ്രതീക്ഷിക്കുന്നില്ലെന്ന് റഷ്യൻ വക്താവ് ദിമിത്രി പെസ്കോവ് പറഞ്ഞു. ഇരുപക്ഷത്തിന്റെയും ആവശ്യങ്ങൾ തികച്ചും വിപരീത ദിശയിലാണെന്നും അദ്ദേഹം കൂട്ടിച്ചേർത്തു.

നേരത്തെ, ഇസ്താംബൂളിൽ വെച്ച് മെയ് 16-നും ജൂൺ 2-നുമായി രണ്ട് ഘട്ട ചർച്ചകൾ നടന്നിരുന്നു. ഈ ചർച്ചകൾ ആയിരക്കണക്കിന് യുദ്ധത്തടവുകാരെയും മരിച്ച സൈനികരുടെ മൃതദേഹങ്ങളും കൈമാറുന്നതിലേക്ക് നയിച്ചുവെങ്കിലും, വെടിനിർത്തലിലോ യുദ്ധം അവസാനിപ്പിക്കുന്നതിലോ യാതൊരു മുന്നേറ്റവും ഉണ്ടായിരുന്നില്ല. മൂന്നര വർഷത്തോളമായി തുടരുന്ന ഈ യുദ്ധം അവസാനിപ്പിക്കാൻ പുതിയ ചർച്ചകൾക്ക് സാധിക്കുമോ എന്ന് ഉറ്റുനോക്കുകയാണ് ലോകരാജ്യങ്ങൾ. അതേസമയം, യുഎസ് പ്രസിഡന്റ് ഡൊണാൾഡ് ട്രംപ് റഷ്യക്ക് 50 ദിവസത്തെ വെടിനിർത്തൽ അന്ത്യശാസനം നൽകിയിട്ടുണ്ടെങ്കിലും, പാശ്ചാത്യ രാജ്യങ്ങൾ തന്റെ വ്യവസ്ഥകൾ അംഗീകരിക്കുന്നത് വരെ യുദ്ധം തുടരാനാണ് പുടിന്റെ തീരുമാനമെന്ന് ക്രെംലിനുമായി അടുത്ത വൃത്തങ്ങൾ റോയിട്ടേഴ്സിനോട് പറഞ്ഞു.

കിഴക്കൻ യുക്രെയ്നിൽ റഷ്യയുടെ ആക്രമണം ശക്തമായി തുടരുകയാണ്. ആയിരം കിലോമീറ്ററിലധികം നീളുന്ന യുദ്ധമുഖത്ത് കനത്ത പോരാട്ടമാണ് നടക്കുന്നത്. റഷ്യൻ സൈന്യം കിഴക്കൻ മേഖലകളിലേക്ക് മുന്നേറുകയും ദിവസേന നൂറുകണക്കിന് ഡ്രോണുകൾ ഉപയോഗിച്ച് യുക്രെനിയൻ നഗരങ്ങളിൽ ആക്രമണം നടത്തുകയും ചെയ്യുന്നുണ്ട്. യുക്രെയ്ൻ തിരിച്ചടിക്കുന്നുണ്ടെങ്കിലും, റഷ്യയുടെ ആധുനിക ഡ്രോണുകൾ തടയാൻ അവർക്ക് കൂടുതൽ ബുദ്ധിമുട്ടാണ്. യുക്രെനിയൻ തടവുകാരെയും റഷ്യ തട്ടിക്കൊണ്ടുപോയ കുട്ടികളെയും തിരികെ കൊണ്ടുവരുന്നതിനാണ് ഈ ചർച്ചകളിൽ സെലെൻസ്കി മുൻഗണന നൽകുന്നത്.

റഷ്യയുടെ പ്രധാന ആവശ്യങ്ങളിൽ യുക്രെനിയൻ സൈന്യം അവർ തങ്ങളുടേതെന്ന് അവകാശപ്പെടുന്ന നാല് പ്രദേശങ്ങളിൽ നിന്ന് പൂർണ്ണമായി പിന്മാറുക, യുക്രെനിയൻ സൈന്യത്തിന്റെ വലുപ്പം പരിമിതപ്പെടുത്തുക, റഷ്യൻ സംസാരിക്കുന്നവരുടെ അവകാശങ്ങൾ ഉറപ്പാക്കുക, നാറ്റോയിലോ മറ്റ് സഖ്യങ്ങളിലോ ചേരാതെ നിഷ്പക്ഷ പദവി സ്വീകരിക്കുക എന്നിവ ഉൾപ്പെടുന്നു. എന്നാൽ, ഈ ആവശ്യങ്ങളെല്ലാം കീഴടങ്ങലിന് തുല്യമാണെന്നും റഷ്യയുടെ അന്ത്യശാസനമാണിതെന്നും യുക്രെയ്ൻ വിലയിരുത്തുന്നു. ഉടനടി വെടിനിർത്തൽ, യുദ്ധ നഷ്ടപരിഹാരം, അന്താരാഷ്ട്ര സുരക്ഷാ ഉറപ്പുകൾ, സൈനിക ശക്തിക്ക് നിയന്ത്രണമില്ലായ്മ എന്നിവയാണ് യുക്രെയ്ൻ ആവശ്യപ്പെടുന്നത്. ഇതിനിടെ, അഴിമതി വിരുദ്ധ ഏജൻസികളുടെ സ്വാതന്ത്ര്യം ഇല്ലാതാക്കുന്ന പുതിയ നിയമത്തിനെതിരെ യുക്രെയ്നിൽ വലിയ പ്രതിഷേധങ്ങൾ ഉയർന്നിട്ടുണ്ട്. യൂറോപ്യൻ യൂണിയനിൽ ചേരുന്നതിനുള്ള പ്രധാന വ്യവസ്ഥകളിലൊന്നായ അഴിമതി നിർമാർജനത്തിന് ഈ നിയമം തിരിച്ചടിയാകുമെന്നാണ് വിമർശകരുടെ വാദം.

The stage is set for the Putin-Zelensky meeting; will both sides be ready for a compromise?