കാനഡയിലെ ആദ്യത്തെയും ഏക പ്രൊഫഷണൽ വനിതാ സോക്കർ ലീഗുമായ നോർത്തേൺ സൂപ്പർ ലീഗിന് (NSL) 1.8 ലക്ഷം ഡോളർ സാമ്പത്തിക സഹായം പ്രഖ്യാപിച്ച് കനേഡിയൻ സർക്കാർ. പ്രാദേശിക സമ്പദ്വ്യവസ്ഥയെ ശക്തിപ്പെടുത്തുന്നതിലും ഉന്നതിയിലെത്തിക്കുന്നതിലും കായിക ടൂറിസം ഒരു നിർണായക പങ്കുവഹിക്കുന്നുണ്ടെന്ന് സർക്കാർ വ്യക്തമാക്കി. ഈ സഹായം ലീഗിന്റെ ആദ്യ സീസണിൽത്തന്നെ രാജ്യത്തെ വനിതാ കായിക മേഖലയിൽ വലിയ മാറ്റങ്ങൾ കൊണ്ടുവരാൻ ലക്ഷ്യമിടുന്നു.
ഫെഡറൽ ഇക്കണോമിക് ഡെവലപ്മെൻ്റ് ഏജൻസി ഫോർ സതേൺ ഒന്റാറിയോയുടെയും (FedDev Ontario) ആർട്ടിഫിഷ്യൽ ഇൻ്റലിജൻസ്, ഡിജിറ്റൽ ഇന്നൊവേഷൻ എന്നിവയുടെയും മന്ത്രിയായ എവാൻ സോളമനുവേണ്ടി, സ്റ്റേറ്റ് സെക്രട്ടറി (സ്പോർട്സ്) ആദം വാൻ കോവർഡനാണ് ഈ തുക പ്രഖ്യാപിച്ചത്.
ഈ വർഷം നവംബർ 15-ന് ഉച്ചയ്ക്ക് 2:00-ന് ടൊറന്റോയിലെ BMO ഫീൽഡിൽ നടക്കുന്ന NSL ഫൈനലിന് വേണ്ടിയാണ് ഈ സാമ്പത്തിക സഹായം. കനേഡിയൻ കായികരംഗത്തും വനിതാ സോക്കറിനും ഇത് ഒരു ചരിത്രപരമായ നിമിഷമാവും. ചാമ്പ്യൻഷിപ്പ് മത്സരം, ആരാധകർക്കായി പുതിയ പരിപാടികൾ എന്നിവ ഉൾക്കൊള്ളുന്ന മൂന്ന് ദിവസത്തെ ആഘോഷങ്ങളിലൂടെയാണ് ഇത് നടക്കുക. ഇത് രാജ്യത്തിനകത്തും പുറത്തുമുള്ള സന്ദർശകരെ ആകർഷിക്കുമെന്നതാണ് ഇതിന്റെ പ്രത്യേകത.
കനേഡിയൻ സർക്കാർ ടൂറിസം മേഖലയെ വികസിപ്പിക്കാനായി വിവിധ പദ്ധതികൾ നടപ്പിലാക്കുന്നുണ്ട്. ടൂറിസം ആകർഷണങ്ങളിൽ നിക്ഷേപം നടത്തുക, തുറന്ന സ്ഥലങ്ങളിലെ വിനോദങ്ങൾ പ്രോത്സാഹിപ്പിക്കുക, തദ്ദേശീയ ടൂറിസം വളർത്തുക, വലിയ അന്താരാഷ്ട്ര പരിപാടികൾ കാനഡയിലേക്ക് ആകർഷിക്കുക എന്നിവ ഇതിൽ ഉൾപ്പെടുന്നു.
