ദുബായിൽ നിന്ന് ആരംഭിച്ച് സാമൂഹിക മാധ്യമങ്ങളിലൂടെ ലോകമെമ്പാടും തരംഗമായ പിസ്ത നിറച്ച ചോക്ലേറ്റ് ബാർ ഇപ്പോൾ കാനഡയിലെ ഓട്ടവയിലും ഒരു പുതിയ മധുര വിപ്ലവം സൃഷ്ടിച്ചിരിക്കുകയാണ്. ക്രീം പോലുള്ള പച്ച നിറത്തിലുള്ള ഫില്ലിംഗും മൊരിഞ്ഞ പുറംഭാഗവുമാണ് ഈ ദുബായ് ചോക്ലേറ്റിന്റെ പ്രധാന ആകർഷണം. ടിക് ടോക്കിലൂടെ പ്രശസ്തമായ ഈ മധുര പലഹാരം ഇപ്പോൾ ഓട്ടവയിലെ ചെറുകിട കടകൾ മുതൽ കോസ്റ്റ്കോ പോലുള്ള വലിയ ഹൈപ്പർമാർക്കറ്റുകളിൽ വരെ ലഭ്യമാണ്. ഇതൊരു ആഢംബര വിഭവമെന്ന നിലയിൽ വലിയ പ്രചാരം നേടിക്കഴിഞ്ഞു.
ഈ തരംഗത്തിന് പിന്നിൽ പ്രാദേശിക ബിസിനസ്സായ ജ്യൂസ് ഡ്യൂഡ്സ് ഒരു പ്രധാന പങ്ക് വഹിച്ചിട്ടുണ്ട്. മാസങ്ങൾ നീണ്ട പരിശ്രമത്തിനൊടുവിൽ അവർ ഈ ചോക്ലേറ്റിന്റെ തനത് രുചിയിൽ സ്വന്തം പതിപ്പ് വികസിപ്പിക്കുകയായിരുന്നു. അവരുടെ ചോക്ലേറ്റ് യഥാർത്ഥ ദുബായ് പതിപ്പിനേക്കാൾ മികച്ചതാണെന്ന് ഉപഭോക്താക്കൾ അഭിപ്രായപ്പെടുന്നതായി ഉടമ ബിലാൽ സെർഹാനെ പറയുന്നു. പിസ്ത, ഹസൽനട്ട് എന്നീ രുചികളിൽ ലഭ്യമായ ഇവയ്ക്ക് 7 ഡോളർ മുതലാണ് വില ആരംഭിക്കുന്നത്. സമീപത്തുള്ള “പിസ്തേഷ്യോ ചോക്കോ” എന്ന സ്ഥാപനം 10 ഡോളറിന് കൈകൊണ്ട് നിർമ്മിച്ച പതിപ്പ് വിൽക്കുന്നുണ്ട്. ഇതിൽ പിസ്തയുടെയും കനാഫയുടെയും സ്വാഭാവിക മിശ്രിതമാണ് ഉപയോഗിക്കുന്നത്. കൂടാതെ എണ്ണയോ പഞ്ചസാരയോ കൃത്രിമ നിറങ്ങളോ ചേർക്കുന്നില്ല എന്നതും ഇവരുടെ പ്രത്യേകതയാണ്.
ദുബായ് ചോക്ലേറ്റിന്റെ കൃത്യമായ ഉത്ഭവത്തെക്കുറിച്ച് വ്യക്തതയില്ലെങ്കിലും, അതിന്റെ ടിക് ടോക് പ്രശസ്തി ഓട്ടവയിൽ പുതിയ പാചക കണ്ടു പിടുത്തങ്ങൾക്ക് പ്രചോദനമായിട്ടുണ്ട്. ദുബായ് ചോക്ലേറ്റ് നിറച്ച കുക്കികളും സ്ട്രോബെറി കപ്പുകളും ഇപ്പോൾ കടകളിൽ ലഭ്യമാണ്. ഇറക്കുമതി ചെയ്ത പതിപ്പുകൾക്ക് ഓൺലൈനിൽ 25 ഡോളറിലധികം വിലയുണ്ട്. രുചിയോ, ഘടനയോ, അതോ ട്രെൻഡ് പിന്തുടരുന്നതിലുള്ള താൽപര്യമോ ആകട്ടെ, ഓട്ടവയിലെ ജനങ്ങൾക്ക് ഈ വൈറൽ മധുരത്തോട് അടങ്ങാത്ത അഭിനിവേശമാണുള്ളത്.
Content Highlights: Viral Dubai chocolate now a hit in Ottawa from tiktok
