ഹാസ്യനടൻ കപിൽശർമ കാനഡയിൽ പുതുതായി തുറന്ന റസ്റ്ററന്റിൽ വെടിവെപ്പുണ്ടായതിന് പിന്നാലെ ഓഷിവാരയിൽ അദ്ദേഹം താമസിക്കുന്ന കെട്ടിടം മുംബൈ പോലീസ് സന്ദർശിച്ചു. കപിലിന്റെ വസതിയുടെ വിലാസം സ്ഥിരീകരിക്കുക എന്നതായിരുന്നു സന്ദർശനത്തിന്റെ ഉദ്ദേശ്യമെന്ന് ഒരു മുതിർന്ന ഉദ്യോഗസ്ഥൻ പറഞ്ഞു. ഓഷിവാരയിലെ ഡിഎൽഎച്ച് എൻക്ലേവ് കെട്ടിടത്തിലാണ് പോലീസ് സന്ദർശനം നടത്തിയത്. വിലാസം സ്ഥിരീകരിച്ച ശേഷം പോലീസ്സംഘം ഇവിടെനിന്നുംപോയി. കപിൽശർമയുടെ സുരക്ഷ വർധിപ്പിച്ചിട്ടില്ലെന്നും അദ്ദേഹത്തിന്റെ മൊഴിരേഖപ്പെടുത്തിയിട്ടില്ലെന്നും പോലീസ് വ്യക്തമാക്കി.
കാനഡയിലെ ബ്രിട്ടീഷ് കൊളംബിയയിലെ സറേ, ഡെൽറ്റ പട്ടണങ്ങളുടെ അതിർത്തിയിൽ പുതുതായി തുറന്ന ‘കാപ്സ് കഫേ’ എന്ന കഫേയിൽ
വ്യാഴാഴ്ച പുലർച്ചെയാണ് വെടിവയ്പ്പുണ്ടായത്. വെടിവയ്പ്പിൽ ആർക്കും പരിക്കേറ്റിട്ടില്ലെന്ന് പോലീസ് അറിയിച്ചു. ജൂലൈ 4 നാണ് കഫേ ഉദ്ഘാടനം ചെയ്തത്.
