സാസ്കാച്ചെവാനിലെ ക്രേവൻ ഗ്രാമം സംഗീതത്തിന്റെ ലഹരിയിൽ ആറാടാൻ ഒരുങ്ങുന്നു. പ്രശസ്തമായ കൺട്രി തണ്ടർ സാസ്കാച്ചെവാൻ സംഗീതോത്സവത്തിന് ഇന്ന് (ജൂലൈ 10) തുടക്കമായി. പ്രായഭേദമന്യേ ആയിരക്കണക്കിന് ആരാധകരാണ് ഈ സംഗീത മാമാങ്കത്തിന്റെ ഭാഗമാകാൻ തടിച്ചുകൂടുന്നത്. 15 വർഷമായി കുടുംബത്തോടൊപ്പം ഈ മേളയിൽ പങ്കെടുക്കുന്ന ബ്രാൻ്റ് ബ്രിട്ടൻ പറയുന്നത്, “നമ്മൾ എവിടെ നിന്ന് വരുന്നു, ആരുടെ പക്ഷത്താണ് എന്നതൊന്നും ഇവിടെ ഒരു വിഷയമല്ല. വെറും സന്തോഷം മാത്രമാണ് ഇവിടെ പ്രധാനം” എന്നാണ്. ജൂലൈ 10 മുതൽ 13 വരെ നീണ്ടുനിൽക്കുന്ന ഈ നാല് ദിവസത്തെ ഉത്സവം പ്രവിശ്യയിലെ ഏറ്റവും വലിയ കൺട്രി സംഗീത പരിപാടിയാണ്.”ഇതൊരു പഴയ സമൂഹമാണ്, നമ്മൾ വീണ്ടും അവിടേക്ക് മടങ്ങിയെത്തുകയാണ്. എല്ലാ വർഷവും നാല് ദിവസത്തേക്ക് ഒരു പ്രേതനഗരം പുനരുജ്ജീവിപ്പിക്കുന്നതുപോലെയാണിത്,” ബ്രിട്ടൻ കൂട്ടിച്ചേർത്തു.
ബുധനാഴ്ച ദിവസം മുഴുവൻ ആളുകൾ അവരുടെ മോട്ടോർഹോമുകളും ക്യാമ്പിംഗ് ഉപകരണങ്ങളുമായി ക്യാമ്പ് ഗ്രൗണ്ടുകളിലേക്ക് എത്തിച്ചേർന്ന് വാരാന്ത്യ പരിപാടികൾക്കായി തയ്യാറെടുപ്പുകൾ നടത്തി. കൺട്രി സംഗീത സൂപ്പർ താരങ്ങളായ ജേസൺ അൽഡിയൻ, ബെയ്ലി സിമ്മർമാൻ, 1980-കളിലെ റോക്ക് ഗ്രൂപ്പായ ഡെഫ് ലെപ്പാർഡ് എന്നിവരുൾപ്പെടെ ഇരുപതോളം സംഗീതജ്ഞർ ഈ വർഷത്തെ ഉത്സവത്തിൽ അണിനിരക്കും. കൺട്രി തണ്ടർ മ്യൂസിക് ഫെസ്റ്റിവൽസിന്റെ എക്സിക്യൂട്ടീവ് ഡയറക്ടർ കിം ബ്ലെവിൻസ് പറയുന്നതനുസരിച്ച്, വടക്കേ അമേരിക്കയിൽ നടക്കുന്ന ഏഴ് ഫെസ്റ്റിവലുകളിൽ ഒന്നാണിത്. ഓരോ പരിപാടിക്കും വലിയ തോതിലുള്ള മുന്നൊരുക്കങ്ങൾ ആവശ്യമാണെങ്കിലും, സാസ്കാച്ചെവാനിലെ ക്രേവൻ ഫെസ്റ്റിവൽ ഒരു പ്രത്യേകതയാണ്. “ക്രേവനാണ് ഈ ഉത്സവ പരമ്പരയുടെ തുടക്കം. 2005-ൽ ഞങ്ങൾ ഇവിടെ നിന്നാണ് ആരംഭിച്ചത്” എന്ന് ബ്ലെവിൻസ് പറഞ്ഞു .
1983-ൽ ട്രോയ് വോൾഹോഫർ സ്ഥാപിച്ച ബിഗ് വാലി ജാംബൂരിയുടെ ആദ്യ രൂപവും ഇവിടെ നിന്നായിരുന്നു. കഴിഞ്ഞ 20 വർഷമായി വടക്കേ അമേരിക്കയിലുടനീളം ഈ ബ്രാൻഡ് കെട്ടിപ്പടുക്കാൻ ഞങ്ങൾക്ക് കഴിഞ്ഞതിൽ ഞങ്ങൾ അഭിമാനിക്കുന്നു, അതെല്ലാം ആരംഭിച്ചത് ക്വാപ്പല്ലെ താഴ്വരയിലെ ചെറിയ ക്രേവനിലാണ്,”എന്ന് ബ്ലെവിൻസ് പങ്കുവെച്ചു. നാല് ദിവസത്തെ ഉത്സവത്തിലുടനീളം 20,000-ത്തിലധികം ആളുകൾ താഴ്വരയിലേക്ക് എത്തുമെന്നാണ് പ്രതീക്ഷിക്കുന്നത്. ഷൗനാവോണിൽ നിന്നുള്ള പ്രാദേശിക കലാകാരന്മാരായ ഹണ്ടർ ബ്രദേഴ്സ് വ്യാഴാഴ്ച രാത്രി പ്രധാന വേദിയിൽ എത്തുന്നത് വലിയ ആവേശമാണ്.
