ഈ വാരാന്ത്യത്തിൽ മെട്രോ വാൻകൂവറിൽ ആഘോഷങ്ങൾ കുറവാണെന്ന് തോന്നാമെങ്കിലും, കാനഡ അതിന്റെ 158-ാം ജന്മദിനം ആഘോഷിക്കുന്നതിന് മുമ്പ് നിരവധി വിനോദങ്ങൾ ഇവിടെ ഒരുക്കിയിട്ടുണ്ട്.
സയൻസ് വേൾഡിൽ ലെഗോ പ്രദർശനം
സയൻസ് വേൾഡിൽ പുതുതായി ആരംഭിച്ച “ആർട്ടെമിസ് സ്പേസ് അഡ്വഞ്ചർ വിത്ത് ലെഗോ ബ്രിക്സ്” എന്ന പ്രദർശനം കുടുംബാംഗങ്ങളെയും കുട്ടികളെയും ആകർഷിക്കുമെന്നതിൽ സംശയിക്കേണ്ട. ലെഗോ ശിൽപ്പങ്ങളും എഞ്ചിനീയറിംഗ് വെല്ലുവിളികളും നിറഞ്ഞതായിരിക്കും ഈ പ്രദർശനം. 2026 ഏപ്രിൽ 6 വരെ പ്രദർശനം കാണികൾക്കായി ഉണ്ടാവുന്നതാണെന്ന് അധികൃതർ അറിയിച്ചു.
തിയേറ്റർ അണ്ടർ ദി സ്റ്റാർസ് & സറേ പ്രൈഡ് ഫെസ്റ്റിവൽ
തിയേറ്റർ അണ്ടർ ദി സ്റ്റാർസിന്റെ ഈ വർഷത്തെ പുതിയ നാടകങ്ങളായ റോൾഡ് ഡാലിന്റെ “ചാർളി ആൻഡ് ദി ചോക്കലേറ്റ് ഫാക്ടറി”, “ലീഗലി ബ്ലോണ്ട്” എന്നിവയുടെ പ്രിവ്യൂ പ്രദർശനങ്ങൾ വെള്ളിയാഴ്ച മുതൽ തിങ്കൾ വരെ നടക്കും. സ്റ്റാൻലി പാർക്കിലെ മാൽക്കിൻ ബൗളിൽ നടക്കുന്ന ഈ തത്സമയ ഔട്ട്ഡോർ തിയേറ്റർ ഓഗസ്റ്റ് 16 വരെ തുടരും. 26-ാമത് വാർഷിക സറേ പ്രൈഡ് ഫെസ്റ്റിവൽ ശനിയാഴ്ച ഉച്ചയ്ക്ക് 12 മുതൽ വൈകുന്നേരം 7 വരെ സറേയിലെ സിവിക് പ്ലാസയിൽ നടക്കും. നിരവധി വിതരണക്കാരും തത്സമയ പ്രകടനങ്ങളും ഈ ആഘോഷത്തിന് മാറ്റു കൂട്ടും.
UBC ഫാമിന്റെ പോളിനേറ്റർ പിക്നിക് & പോർട്ടോബെല്ലോ വെസ്റ്റ് മാർക്കറ്റ്
UBC ഫാമിൽ ശനിയാഴ്ച നടക്കുന്ന പ്രതിവാര കർഷക വിപണിയിൽ പോളിനേറ്ററുകളെ (സസ്യങ്ങളുടെ പരാഗണത്തിന് സഹായിക്കുന്ന ജീവികൾ) ആഘോഷിക്കുന്ന നിരവധി പ്രത്യേക പരിപാടികൾ നടക്കും. ഫാം ടൂറുകൾ, പോളിനേറ്റർ സംബന്ധമായ പ്രോജക്റ്റുകൾ, ബിരുദ വിദ്യാർത്ഥികളുടെ പ്രഭാഷണങ്ങൾ, കുട്ടികൾക്കായുള്ള കളറിംഗ് പ്രവർത്തനങ്ങൾ എന്നിവ സൗജന്യമായിരിക്കും. റാബിറ്റാറ്റ്സ് റാബിറ്റ് റെസ്ക്യൂവിന്റെ ബണ്ണികളോടൊപ്പം “മീറ്റ് എൻ’ ട്രീറ്റ്” ഉം ടീ ടേസ്റ്റിംഗും നടക്കും. “പോളിനേറ്റർ പിക്നിക്” രാവിലെ 10 മുതൽ ഉച്ചയ്ക്ക് 2 വരെയാണ്.
പോർട്ടോബെല്ലോ വെസ്റ്റ് സമ്മർ മാർക്കറ്റ്
പോർട്ടോബെല്ലോ വെസ്റ്റ് അതിന്റെ രണ്ട് വേനൽക്കാല വിപണികളിൽ ആദ്യത്തേത് ശനിയാഴ്ച രാവിലെ 10 മുതൽ വൈകുന്നേരം 5 വരെ വാൻഡ്യൂസൻ ബൊട്ടാണിക്കൽ ഗാർഡൻസിലെ ഫ്ലോറൽ ഹാളിൽ നടത്തും. 39 പ്രാദേശിക ബ്രിട്ടീഷ് കൊളംബിയൻ നിർമ്മാതാക്കൾ അവരുടെ തനതായ ഫാഷൻ, ആഭരണങ്ങൾ, കല, വീട്ടുപകരണങ്ങൾ, ചർമ്മസംരക്ഷണം, രുചികരമായ വിഭവങ്ങൾ, വൈൻ, സ്പിരിറ്റുകൾ എന്നിവയും അതിലേറെയും ഇവിടെ പ്രദർശിപ്പിക്കും. പ്രവേശനം സൗജന്യമാണ്. രണ്ടാമത്തെ വേനൽക്കാല വിപണി ഓഗസ്റ്റ് 16 ന് വാൻഡ്യൂസനിൽ നടക്കുമെന്ന് അധികൃതർ അറിയിച്ചു.
