കഴിഞ്ഞ വാരാന്ത്യത്തിൽ വടക്കൻ ഒന്റാരിയോയിൽ ആഞ്ഞുവീശിയ അതിശക്തമായ കൊടുങ്കാറ്റ് ചുഴലിക്കാറ്റായിരുന്നില്ലെന്ന് സ്ഥിരീകരണം. സാമുവൽ ഡി ഷാംപ്ലെയിൻ പ്രൊവിൻഷ്യൽ പാർക്കിന് സമീപം ആഞ്ഞുവീശിയത് ഒരു ഡൗൺബേസ്റ്റ് (downburst) ആയിരുന്നുവെന്ന് നോർത്തേൺ ടൊർണാഡോസ് പ്രോജക്റ്റ് (Northern Tornadoes Project) സ്ഥിരീകരിച്ചു. കൊടുങ്കാറ്റിനെ തുടർന്നുണ്ടായ വ്യാപകമായ നാശനഷ്ടങ്ങൾ കാരണം മാട്ടാവയ്ക്ക് സമീപമുള്ള സാമുവൽ ഡി ഷാംപ്ലെയിൻ പ്രൊവിൻഷ്യൽ പാർക്ക് ഇപ്പോഴും അടച്ചിട്ടിരിക്കുകയാണ്.
നിരവധി മരങ്ങൾ കടപുഴകി വീഴുകയും വൈദ്യുതി ലൈനുകൾ തകരുകയും ചെയ്തതിനെ തുടർന്ന് ചില ക്യാമ്പർമാരെ രക്ഷപ്പെടുത്തേണ്ടി വന്നിരുന്നു. “മൈക്രോബേസ്റ്റ് ഉൾപ്പെട്ട കൊടുങ്കാറ്റ് പാർക്കിൽ വ്യാപകമായ മരങ്ങൾകൊണ്ടുള്ള നാശനഷ്ടങ്ങൾക്കും അപകടകരമായ സാഹചര്യങ്ങൾക്കും കാരണമായെന്ന് പാർക്ക് അധികൃതർ ചൊവ്വാഴ്ച സോഷ്യൽ മീഡിയയിൽ അറിയിച്ചു. നാശനഷ്ടങ്ങൾ വിലയിരുത്തുന്നതിനും അവശിഷ്ടങ്ങൾ നീക്കം ചെയ്യുന്നതിനും ദുരിതബാധിതർക്ക് സഹായം നൽകുന്നതിനും അടിയന്തര രക്ഷാപ്രവർത്തകർ സജീവമായി പ്രവർത്തിക്കുന്നുണ്ടെന്നും അവർ കൂട്ടിച്ചേർത്തു.
പലരും ചുഴലിക്കാറ്റാണ് നാശനഷ്ടങ്ങൾക്ക് കാരണമെന്ന് ഊഹിച്ചെങ്കിലും, നോർത്തേൺ ടൊർണാഡോസ് പ്രോജക്റ്റിലെ ഡോ. കൊണൽ മില്ലർ മാധ്യമങ്ങൾക്ക് അയച്ച ഇമെയിലിൽ സ്ഥിരീകരിച്ചത് ഇത് ഡൗൺബേസ്റ്റ് ആണെന്നാണ്. “മഴയോടുകൂടിയ അതിശക്തമായ കാറ്റാണ് ഡൗൺബേസ്റ്റ്. ഇതിന് ചുഴലിക്കാറ്റിന് സമാനമായ നാശനഷ്ടങ്ങൾ ഉണ്ടാക്കാൻ സാധിക്കും. കാറ്റിന്റെ ഈ തീവ്രത എങ്ങനെയാണ് ഉണ്ടാകുന്നത് എന്നതിലെ വ്യത്യാസം മാത്രമാണുള്ളതെന്ന് ഡോ. മില്ലർ വിശദീകരിച്ചു.
നാശനഷ്ടങ്ങളുടെ പൂർണ്ണ വ്യാപ്തിയും പരമാവധി കാറ്റിന്റെ വേഗതയും നിർണ്ണയിക്കാൻ കൂടുതൽ അന്വേഷണം ആവശ്യമാണെന്നും, എന്നാൽ ഇത് തങ്ങൾ ഇതുവരെ കണ്ടിട്ടുള്ള ഏറ്റവും ശക്തമായ ഡൗൺബേസ്റ്റുകളിലൊന്നിന് സമാനമാണെന്നും അദ്ദേഹം കൂട്ടിച്ചേർത്തു. സാമുവൽ ഡി ഷാംപ്ലെയിൻ പാർക്കിലെ അധികൃതർ പ്രാദേശിക, അടിയന്തര സേവനങ്ങളുമായി ചേർന്ന് പുനരുദ്ധാരണ പ്രവർത്തനങ്ങൾ നടത്തുകയാണ്.
“പുനരുദ്ധാരണ പദ്ധതികൾ നിലവിൽ വികസിപ്പിച്ചുകൊണ്ടിരിക്കുന്നു,” പാർക്ക് അധികൃതർ പറഞ്ഞു. “പാർക്ക് പൂർണ്ണമായി പ്രവർത്തനക്ഷമമാകാൻ കുറഞ്ഞത് ഒരാഴ്ചയെങ്കിലും എടുക്കുമെന്നാണ് പ്രതീക്ഷിക്കുന്നത്. മുൻകൂട്ടി ബുക്ക് ചെയ്തവരെ വിവരമറിയിച്ചിട്ടുണ്ട്. പാർക്കിന്റെ നിലവിലെ അവസ്ഥ അറിയാൻ ബന്ധപ്പെട്ട വെബ്സൈറ്റുകൾ സന്ദർശിക്കാവുന്നതാണ്.”
