കാനഡയുടെ മുൻ കാബിനറ്റ് മന്ത്രിയും ഒൻ്റാറിയോയിലെ മാർഖം മണ്ഡലത്തിലെ മുൻ എംപിയുമായ ജോൺ മക്കാലം (75) അന്തരിച്ചു. 2025 ജൂൺ 21-ന് അദ്ദേഹം കുടുംബാംഗങ്ങളോടൊപ്പം സമാധാനപരമായി വിടവാങ്ങിയതായി കുടുംബം സോഷ്യൽ മീഡിയയിലൂടെ പുറത്തിറക്കിയ പ്രസ്താവനയിൽ അറിയിച്ചു. 2000 മുതൽ 2015 വരെ ഫെഡറൽ എംപിയായി സേവനമനുഷ്ഠിച്ച മക്കാലം, ഇമിഗ്രേഷൻ, പ്രതിരോധം, നാഷണൽ റെവന്യൂ തുടങ്ങിയ സുപ്രധാന വകുപ്പുകളുടെ മന്ത്രിസ്ഥാനങ്ങൾ വഹിച്ചിട്ടുണ്ട്. പിന്നീട് ചൈനയിലെ കാനഡയുടെ അംബാസഡറായും അദ്ദേഹം പ്രവർത്തിച്ചു.
ജോൺ മക്കാലത്തിൻ്റെ വിയോഗത്തിൽ കാനഡയിലെ രാഷ്ട്രീയ രംഗത്തെ പ്രമുഖർ അനുശോചനം രേഖപ്പെടുത്തി. വിദേശകാര്യ മന്ത്രി അനിത ആനന്ദ് ട്വിറ്ററിൽ കുറിച്ചത് ഇങ്ങനെ: “2019-ൽ ഞാൻ തിരഞ്ഞെടുപ്പിലേക്ക് കടന്നുവന്നപ്പോൾ മുതൽ ജോൺ എന്നെ പിന്തുണച്ചിരുന്നു. അദ്ദേഹത്തിൻ്റെ പ്രോത്സാഹനവും നിർദ്ദേശങ്ങളും ഞാൻ ഒരിക്കലും മറക്കില്ല.” ന്യൂഫൗണ്ട്ലാൻഡ് ആൻഡ് ലബ്രഡോറിൻ്റെ മുൻ മുഖ്യമന്ത്രിയായ ആൻഡ്രൂ ഫ്യൂറി, മക്കാലമിനെ തൻ്റെ നല്ല സുഹൃത്തും പ്രിയപ്പെട്ട ഉപദേശകനുമായി വിശേഷിപ്പിച്ചു. “അദ്ദേഹം കരുണയുള്ളവനും ദയാലുവും എപ്പോഴും മറ്റുള്ളവർക്കായി സമയം കണ്ടെത്തുന്നവനുമായിരുന്നു,” ഫ്യൂറി ഓർമ്മിച്ചു.
കനേഡിയൻ രാഷ്ട്രീയ രംഗത്ത് അതുല്യമായ സംഭാവനകൾ നൽകിയ മക്കാലത്തിൻ്റെ നിര്യാണം രാജ്യത്തിന് വലിയ നഷ്ടമാണെന്ന് നേതാക്കൾ അഭിപ്രായപ്പെട്ടു. ദീർഘകാലം പൊതുസേവനത്തിൽ മുഴുകിയ അദ്ദേഹം രാജ്യത്തിൻ്റെ പുരോഗതിക്കായി നൽകിയ സംഭാവനകൾ എന്നും ഓർമ്മിക്കപ്പെടുമെന്ന് രാഷ്ട്രീയ നിരീക്ഷകർ പറയുന്നു.*
