കിച്ചനറിലെ ഒരു വീട്ടിലുണ്ടായ വെടിവെപ്പിൽ വാട്ടർലൂ റീജിയണൽ പോലീസ് അന്വേഷണം ആരംഭിച്ചു. ശനിയാഴ്ച രാത്രി 9:50-ഓടെയാണ് ബ്രെക്കൻറിഡ്ജ് ഡ്രൈവ് പ്രദേശത്തുള്ള വീട്ടിൽ വെടിവെപ്പുണ്ടായതായി പോലീസിന് വിവരം ലഭിച്ചത്.
അജ്ഞാതരായ മൂന്ന് സായുധ പ്രതികൾ വീട്ടിൽ അതിക്രമിച്ച് കയറി സാധനങ്ങൾ മോഷ്ടിക്കുകയായിരുന്നുവെന്ന് അന്വേഷണ ഉദ്യോഗസ്ഥർ അറിയിച്ചു.
ഈ സമയം വീട്ടുടമസ്ഥൻ തിരിച്ചെത്തുകയും മോഷ്ടാക്കളെ കണ്ടെത്തുകയും ചെയ്തതോടെ വാക്കുതർക്കമുണ്ടായി. ഇതിനിടെ മോഷ്ടാക്കൾ വെടിയുതിർക്കുകയായിരുന്നു. വെടിവെപ്പിൽ രണ്ട് പേർക്ക് ഗുരുതര പരിക്കുകളുണ്ട്. മോഷ്ടാക്കൾ ഒരു വാഹനത്തിൽ രക്ഷപ്പെട്ടു. വെല്ലിംഗ്ടൺ സ്ട്രീറ്റ് നോർത്തിലെ ഹൈവേ എക്സിറ്റ് വരെ പോലീസ് ഇവരെ പിന്തുടർന്നു, അവിടെ വെച്ച് വീണ്ടും വെടിവെപ്പുണ്ടായി.
സംഭവത്തിൽ അന്വേഷണം തുടരുന്നതിനാൽ ഞായറാഴ്ചയും ബ്രെക്കൻറിഡ്ജ് ഡ്രൈവ്, വെല്ലിംഗ്ടൺ സ്ട്രീറ്റ് നോർത്ത് എന്നിവിടങ്ങളിൽ പോലീസ് സാന്നിധ്യമുണ്ടാകും. സംഭവത്തെക്കുറിച്ച് എന്തെങ്കിലും വിവരങ്ങളുള്ളവർ പോലീസുമായി ബന്ധപ്പെടണമെന്ന് അധികൃതർ അറിയിച്ചു.
