വർഷങ്ങൾക്ക് ശേഷം മമ്മൂട്ടിയും മോഹൻലാലും ഒന്നിക്കുന്ന മൾട്ടി സ്റ്റാർ സിനിമയുടെ ഔദ്യോഗിക ടൈറ്റിൽ പുറത്തു വന്നിരിക്കുകയാണ്. ‘പേട്രിയറ്റ്’ എന്നാണ് ഈ ബിഗ് ബഡ്ജറ്റ് ചിത്രത്തിന്റെ പേരെന്ന് ശ്രീലങ്കൻ ടൂറിസം അതോറിറ്റിയുടെ ഫെയ്സ്ബുക്ക് പേജിലൂടെ ചോർന്നിരിക്കുന്നത്. സിനിമയുടെ എട്ടാം ഷെഡ്യൂൾ ചിത്രീകരണത്തിനായി ശ്രീലങ്കയിൽ എത്തിയ മോഹൻലാലിനെ സ്വാഗതം ചെയ്യുന്നതിനിടെയാണ് ഈ വിവരം പുറത്തുവന്നത്.
അണിയറ പ്രവർത്തകർ രഹസ്യമായി വെച്ചിരുന്ന ചിത്രത്തിന്റെ പേര് ഇങ്ങനെ അപ്രതീക്ഷിതമായി പുറത്തുവന്നതിൽ ആരാധകർക്കിടയിൽ വ്യാപക പ്രതിഷേധമുണ്ടായിട്ടുണ്ട്. സിനിമയുടെ ഏതെങ്കിലും അപ്ഡേറ്റുകൾ പോലും അണിയറ പ്രവർത്തകർ പങ്കിടുന്നത് വളരെ കുറവായിരുന്നു. ഈ സാഹചര്യത്തിൽ ശ്രീലങ്കൻ ടൂറിസം വകുപ്പിന്റെ പോസ്റ്റിലൂടെ ടൈറ്റിൽ വെളിപ്പെട്ടത് ആരാധകരെ അത്ഭുതപ്പെടുത്തിയിരിക്കുകയാണ്.
“സിനിമയുടെ പേര് ശ്രീലങ്കൻ ടൂറിസം പേജ് വെളിപ്പെടുത്തിയതോടെ ബാക്കി അപ്ഡേറ്റുകൾ കെഎസ്ആർടിസി പേജിൽ വരുമോ എന്ന് ആരാധകർ പരിഹസത്തോടെ ചോദിക്കുന്നു. സോഷ്യൽ മീഡിയയിൽ ഈ വിഷയം വ്യാപകമായി ചർച്ച ചെയ്യപ്പെടുകയും മീമുകളുടെ രൂപത്തിൽ പ്രചരിപ്പിക്കപ്പെടുകയും ചെയ്യുന്നു. എന്നാൽ അണിയറ പ്രവർത്തകരുടെ ഭാഗത്തുനിന്ന് ഇതുവരെ ഔദ്യോഗിക സ്ഥിരീകരണമോ പ്രതികരണമോ ലഭിച്ചിട്ടില്ല.
നിലവിൽ ‘പേട്രിയറ്റ്’ സിനിമയുടെ ചിത്രീകരണം ശ്രീലങ്കയിൽ പുരോഗമിക്കുകയാണ്. മോഹൻലാൽ, കുഞ്ചാക്കോ ബോബൻ, ഫഹദ് ഫാസിൽ, ദർശന രാജേന്ദ്രൻ എന്നിവർ ഉൾപ്പെടുന്ന പത്തുദിവസത്തെ ഷെഡ്യൂൾ ആണ് നിലവിൽ നടന്നുകൊണ്ടിരിക്കുന്നത്. മലയാള സിനിമയിലെ രണ്ട് മഹാതാരങ്ങളെയും ഒന്നിപ്പിക്കുന്ന ഈ ചിത്രത്തിന്റെ മറ്റ് വിശദാംശങ്ങൾ ഔദ്യോഗികമായി പ്രഖ്യാപിക്കപ്പെടുന്നതിനായി ആരാധകർ കാത്തിരിക്കുകയാണ്.
