കാനഡയിലെ കാർണി സർക്കാർ അവതരിപ്പിച്ച പുതിയ അതിർത്തി നിയമനിർമ്മാണമായ ബിൽ സി-2 — ഔദ്യോഗികമായി “സ്ട്രോങ് ബോർഡേഴ്സ് ആക്ട്” എന്ന പേരിലാണ് അറിയപ്പെടുന്നത്. ഈ ബില്ല് കനേഡിയൻ പൗരന്മാരുടെ സ്വകാര്യതയ്ക്ക് ഭീഷണിയാണെന്ന് പൗരാവകാശ സംഘടനകളും നിയമ വിദഗ്ധരും പ്രതിപക്ഷ എംപിമാരും ഉൾപ്പെടെയുള്ളവർ ശക്തമായി വിമർശിക്കുന്നുണ്ട്. കാനഡ-യു.എസ്. അതിർത്തിയിലെ സുരക്ഷ വർദ്ധിപ്പിക്കുക എന്ന ലക്ഷ്യത്തോടെയാണ് ഈ ബിൽ കൊണ്ടുവന്നതെങ്കിലും, അതിന്റെ 140 പേജുകളിൽ ഇന്റർനെറ്റ് വരിക്കാരുടെ വിവരങ്ങൾ വാറന്റില്ലാതെ പരിശോധിക്കാൻ നിയമ നിർവ്വഹണ ഏജൻസികൾക്ക് അധികാരം നൽകുന്ന വിവാദ വ്യവസ്ഥകൾ അടങ്ങിയിട്ടുണ്ടെന്നാണ് പ്രധാന ആരോപണം.
ഈ ഡിജിറ്റൽ നിരീക്ഷണ നടപടികളെ “ചാരവൃത്തി വ്യവസ്ഥകൾ” എന്നാണ് കൺസർവേറ്റീവ് എംപി മിഷേൽ റെംപൽ ഗാർണർ വിശേഷിപ്പിച്ചത്. അതേസമയം, എൻഡിപി എംപി ജെന്നി ക്വാൻ, ഈ ബിൽ അതിർത്തിയുമായി ബന്ധമില്ലാത്ത ആഭ്യന്തര കാര്യങ്ങളെയാണ് ലക്ഷ്യമിടുന്നതെന്ന് മുന്നറിയിപ്പ് നൽകി.
ആധുനിക കുറ്റകൃത്യ ഭീഷണികൾ, പ്രത്യേകിച്ചും കുട്ടികളെ ചൂഷണം ചെയ്യുന്നത്, തടയാൻ ഈ ബിൽ അത്യാവശ്യമാണെന്ന് സർക്കാർ വാദിക്കുന്നു. കൂടാതെ, ഇത് അവകാശങ്ങളുടെയും സ്വാതന്ത്ര്യത്തിന്റെയും ചാർട്ടറിന് അനുസൃതമാണെന്നും പബ്ലിക് സേഫ്റ്റി മന്ത്രി ഗാരി ആനന്ദസംഗരി ഉറപ്പ് നൽകി. ബില്ലിനെ ഒട്ടാവ സർവകലാശാലയിലെ നിയമ പ്രൊഫസർ മൈക്കൽ ഗീസ്റ്റ് ശക്തമായി എതിർത്തു. സുപ്രീം കോടതിയുടെ R v. Spencer വിധിയിലൂടെ ലഭിച്ച സ്വകാര്യത സംരക്ഷണം ഈ ബിൽ ഇല്ലാതാക്കുമെന്ന് അദ്ദേഹം ആരോപിക്കുന്നു.
ഇത് പോലീസിനെ ആളുകളുടെ വ്യക്തിഗത വിവരങ്ങൾ വലിയ അളവിൽ ശേഖരിക്കാൻ അനുവദിക്കും. ആരോടും ചോദിക്കേണ്ടതില്ല, ആരോടും കണക്ക് പറയേണ്ടതുമില്ല എന്ന് വിമർശകർ മുന്നറിയിപ്പ് നൽകുന്നു. സാധാരണയായി ഡിജിറ്റൽ വിവര ശേഖരണത്തെ പിന്തുണയ്ക്കുന്ന മുൻ സിസിസ് ഡയറക്ടർ റിച്ചാർഡ് ഫാഡൻ പോലും ഇതിനെതിരാണ്.എന്നാൽ അദ്ദേഹം പോലും പറയുന്നത് നിയമാനുസൃത പ്രവേശനം പ്രത്യേക ബിൽ ആകണമായിരുന്നു എന്നാണ്. അതിർത്തി നിയമത്തിൽ പല വിഷയങ്ങൾ കൂട്ടിച്ചേർക്കരുതായിരുന്നു എന്നും അദ്ദേഹം വ്യക്തമാക്കി.
പാർലമെന്റ് ബിൽ അവലോകനം ചെയ്യാൻ തയ്യാറെടുക്കുമ്പോൾ, കാനഡയിലെ പൗരാവകാശങ്ങൾക്ക് ഇത് ഉണ്ടാക്കാൻ സാധ്യതയുള്ള പ്രത്യാഘാതങ്ങളെക്കുറിച്ച് ആഴത്തിലുള്ള പൊതു ചർച്ചയ്ക്ക് സ്വകാര്യത അഭിഭാഷകർ ആഹ്വാനം ചെയ്യുന്നു.
