കാനഡയിലെ ആൽബർട്ട പ്രവിശ്യയിൽ സ്ഥിര താമസത്തിനു ആഗ്രഹിക്കുന്ന വിദേശികൾക്ക് പുതിയ അവസരം. ആൽബർട്ട അഡ്വാന്റേജ് ഇമിഗ്രേഷൻ പ്രോഗ്രാമിന്റെ (AAIP) കീഴിൽ രണ്ട് വ്യത്യസ്ത സ്ട്രീമുകളിലൂടെ നടത്തിയ ഡ്രോകളിൽ ആകെ 158 ഇമിഗ്രേഷൻ പ്രതീക്ഷകർക്ക് പ്രൊവിൻഷ്യൽ നോമിനേഷനു അപേക്ഷിക്കാനുള്ള ക്ഷണപത്രിക ലഭിച്ചു. മേയ് 13, 15 തീയതികളിൽ നടന്ന ഈ ഡ്രോകൾ കാനഡയിലേക്കുള്ള കുടിയേറ്റത്തിന് കാത്തിരിക്കുന്ന ആയിരക്കണക്കിന് ആളുകൾക്ക് പ്രതീക്ഷ നൽകുന്നു.
മേയ് 13-ന് നടന്ന ആൽബർട്ട ഓപ്പർചുനിറ്റി സ്ട്രീം ഡ്രോയിൽ 125 പേർക്ക് ക്ഷണപത്രിക ലഭിച്ചു. ഈ വിഭാഗത്തിൽ തെരഞ്ഞെടുക്കപ്പെടാനുള്ള കുറഞ്ഞ സ്കോർ 76 ആയിരുന്നു. അതേസമയം മേയ് 15-ന് നടന്ന ടൂറിസം ആൻഡ് ഹോസ്പിറ്റാലിറ്റി സ്ട്രീം ഡ്രോയിൽ 33 പേർക്ക് ക്ഷണം ലഭിച്ചു. ഇവർക്കുള്ള കട്ട്-ഓഫ് സ്കോർ 72 ആയിരുന്നു. താരതമ്യേന കുറഞ്ഞ സ്കോറിൽ തെരഞ്ഞെടുക്കപ്പെടാൻ കഴിയുന്നത് ടൂറിസം മേഖലയിലെ തൊഴിലാളി ക്ഷാമം കാരണമാണ്.
2024-ൽ പുതുതായി ആരംഭിച്ച ടൂറിസം ആൻഡ് ഹോസ്പിറ്റാലിറ്റി സ്ട്രീമിന്റെ പ്രധാന ലക്ഷ്യം ആൽബർട്ടയിലെ ടൂറിസം മേഖലയിലെ വർക്കർ ക്ഷാമം പരിഹരിക്കുകയും ബിസിനസ്സുകൾക്ക് സ്ഥിരത ഉറപ്പാക്കുകയും ചെയ്യുക എന്നതാണ്. ഈ സ്പെഷ്യലൈസ്ഡ് സ്ട്രീമിനു യോഗ്യത നേടുന്നതിന് അപേക്ഷകൻ ആൽബർട്ടയിലെ ടൂറിസം-ഹോസ്പിറ്റാലിറ്റി സ്ഥാപനത്തിൽ കുറഞ്ഞത് ആറുമാസം തുടർച്ചയായി ജോലി ചെയ്തിരിക്കണം. കൂടാതെ അംഗീകൃത തൊഴിലുടമയിൽ നിന്നുള്ള ഫുൾ ടൈം ജോലി ഓഫർ ഉണ്ടായിരിക്കണം. വിദ്യാഭ്യാസ യോഗ്യതകളും ഇംഗ്ലീഷ് അല്ലെങ്കിൽ ഫ്രഞ്ച് ഭാഷാ പ്രാവീണ്യവും പാലിക്കേണ്ടതുണ്ട്.
സ്ഥിതിവിവരക്കണക്കുകൾ പ്രകാരം 2025 വർഷത്തിനുള്ള മൊത്തം നോമിനേഷൻ ക്വോട്ടയായി 4,875 സ്ലോട്ടുകൾ നിശ്ചയിച്ചിട്ടുണ്ട്, ഇതിൽ ഇതുവരെ 2,077 നോമിനേഷനുകൾ അനുവദിച്ചു കഴിഞ്ഞു. നിലവിൽ ഓപ്പർട്യൂണിറ്റി സ്ട്രീമിൽ 1,376 നോമിനേഷൻ സ്ലോട്ടുകൾ ബാക്കിയുണ്ട്, ഇതിനായി 37,934 പേര് കാത്തിരിക്കുകയാണ്. ടൂറിസം സ്ട്രീമിൽ 122 സ്ലോട്ടുകൾ ശേഷിക്കുന്ന സാഹചര്യത്തിൽ 5,755 പേരാണ് അവസരത്തിനായി കാത്തിരിക്കുന്നതെന്ന് AAIP വെബ്സൈറ്റ് വ്യക്തമാക്കുന്നു. ഉയർന്ന മത്സരം ഉണ്ടായിരുന്നിട്ടും രണ്ട് സ്ട്രീമുകളിലും പതിവായി ഡ്രോകൾ നടത്തുന്നത് കാനഡയിലെ കുടിയേറ്റ പ്രക്രിയയിൽ കാര്യമായ പ്രതീക്ഷ നൽകുന്നു.
