കാനഡയിലെ മുൻനിര ടെലികോം സേവനദാതാവായ ബെല് കാനഡയുടെ ലാൻഡ്ലൈൻ, ഇന്റർനെറ്റ് സേവനങ്ങൾ ബുധനാഴ്ച രാവിലെ ഒന്റാറിയോ, ക്യൂബെക് തുടങ്ങിയ പല പ്രദേശങ്ങളിലും കുറച്ചു സമയത്തേക്ക് മുടങ്ങി. എന്നാൽ റൗട്ടറുകളിൽ നടത്തിയ സാങ്കേതിക പുതുക്കൽ പിൻവലിച്ചതിലൂടെ സേവനങ്ങൾ പൂർണമായും വേഗത്തിൽ തിരികെ കൊണ്ടുവരാൻ കഴിഞ്ഞതായി റിപ്പോർട്ടുകൾ വ്യക്തമാക്കി.
ഈ സംഭവം ഒരു സൈബർ ആക്രമണം അല്ലെന്ന് വ്യക്തമാക്കിയ കമ്പനി, ഭാവിയിൽ ഇത്തരം പ്രശ്നങ്ങൾ ഉണ്ടാകാതിരിക്കാൻ വിദഗ്ധരുടെ സഹായത്തോടെ വിശദമായ പഠനം നടത്തുമെന്നും അറിയിച്ചു. കാനഡയിലെ സൈബർ സുരക്ഷാ വിദഗ്ധനായ റിതേഷ് കോതക്ക് ഇത് പൂർണമായും ഒരു സാങ്കേതിക തകരാറാണെന്ന് സ്ഥിരീകരിച്ചു. അദ്ദേഹം പറഞ്ഞതനുസരിച്ച്, ഒരു പുതുക്കൽ തെറ്റായാൽ അതിന്റെ പ്രശ്നം ബന്ധപ്പെട്ട എല്ലാ സംവിധാനങ്ങളെയും ബാധിക്കും, ഇവിടെയും അതാണ് സംഭവിച്ചത്.
2022-ൽ റോജേഴ്സ് കമ്പനിയുടെ സേവനങ്ങൾ തകരാറിലായതിനു ശേഷം, കാനഡ സർക്കാർ പല നിയമങ്ങളും കൊണ്ടുവന്നിരുന്നു. അതിന്റെ ഭാഗമായി ടെലികോം കമ്പനികൾ രണ്ട് മണിക്കൂറിനുള്ളിൽ സേവന തടസ്സങ്ങൾ റിപ്പോർട്ട് ചെയ്യണമെന്ന് നിർദേശിച്ചിരുന്നു. തുടർന്ന്, ബെൽ ഉൾപ്പെടെ 12 കമ്പനികൾ അടിയന്തര സാഹചര്യങ്ങളിൽ പരസ്പരം സഹായിക്കുന്നതിനായി ഒരു കരാറിലും ഒപ്പുവച്ചിട്ടുണ്ട്.
