നിലവിലുള്ള വിപണി സാഹചര്യങ്ങൾ ചൂണ്ടിക്കാട്ടി Subaru of America തങ്ങളുടെ നിരവധി വാഹന മോഡലുകൾക്ക് വിലവർദ്ധനവ് പ്രഖ്യാപിച്ചിരിക്കുകയാണ്. ഈ വിലക്കയറ്റം 750 മുതൽ 2,055 യു.എസ് ഡോളർ വരെയാണ്, ഇത് മോഡലിനും ട്രിമ്മിനും അനുസരിച്ച് മാറുന്നു. 2025 ജൂൺ മുതൽ ഡീലർഷിപ്പുകളിൽ എത്തുന്ന വാഹനങ്ങൾക്കാണ് ഈ വർദ്ധനവ് ബാധകമാവുക. കമ്പനി ഇതിന്റെ കാരണമായി താരിഫുകളെ നേരിട്ട് പരാമർശിച്ചിട്ടില്ലെങ്കിലും, വർദ്ധിച്ചുവരുന്ന ചെലവുകളെക്കുറിച്ച് സൂചിപ്പിച്ചിട്ടുണ്ട്.
സുബാരുവിന്റെ ഈ നീക്കം ട്രംപ് ഭരണകൂടത്തിന് കീഴിൽ അടുത്തിടെ നടപ്പിലാക്കിയ 25% യു.എസ് ഇറക്കുമതി താരിഫുകളുടെ പശ്ചാത്തലത്തിലാണ്. ഈ താരിഫ് വർഷത്തിൽ ഏകദേശം 8 മില്യൺ ഇറക്കുമതി ചെയ്യുന്ന വാഹനങ്ങളെ ബാധിക്കുന്നുണ്ട്. പ്രത്യേകിച്ചും സുബാരുവിന് ഇത് വലിയ ആഘാതമാണ് സൃഷ്ടിക്കുന്നത്, കാരണം അമേരിക്കയിൽ വിൽക്കുന്ന അവരുടെ കാറുകളിൽ 45% ഇറക്കുമതി ചെയ്യപ്പെടുന്നവയാണ്. ഫോർഡ് പോലുള്ള മറ്റ് വാഹന നിർമ്മാതാക്കളും വില വർധിപ്പിച്ചിട്ടുണ്ട് – മെക്സിക്കോയിൽ നിർമ്മിച്ച മോഡലുകൾക്ക് 2,000 യു.എസ് ഡോളർ വരെയാണ്.
സുബാരുവിന്റെ ജനപ്രിയവും കുറഞ്ഞ വിലയുള്ളതുമായ ഫോറെസ്റ്റർ SUV-ക്കാണ് ഏറ്റവും കൂടുതൽ ആഘാതം ഉണ്ടായിരിക്കുന്നത്. ഇതിന് 1,075 മുതൽ 1,600 യു.എസ് ഡോളർ വരെയുള്ള വർദ്ധനവാണ് പ്രഖ്യാപിച്ചിരിക്കുന്നത്.വിശകലന വിദഗ്ധരുടെ അഭിപ്രായത്തിൽ, താരിഫുകൾ കാരണം ഈ വർഷം യു.എസ് വാഹന നിർമ്മാതാക്കൾക്ക് 5 ബില്യൺ ഡോളർ വരെ അധിക ചെലവുകൾ ഉണ്ടാകും എന്നാണ് കണക്കാക്കുന്നത്.
ചെലവ് സമ്മർദ്ദങ്ങൾ ഉണ്ടെങ്കിലും, വാങ്ങുന്നവർക്ക് “solid value proposition” നിലനിർത്താൻ ശ്രമിക്കുന്നതായി സുബാരു ഊന്നിപ്പറഞ്ഞു. എന്നിരുന്നാലും, ഈ വിലക്കയറ്റം യു.എസ് ഓട്ടോമൊബൈൽ വിപണിയിൽ വ്യാപകമായ പ്രത്യാഘാതങ്ങൾ സൃഷ്ടിക്കുമെന്ന് പ്രതീക്ഷിക്കപ്പെടുന്നു, പ്രത്യേകിച്ചും ഇറക്കുമതി ചെയ്ത വാഹനങ്ങളുടെ വില്പനയിലും ലഭ്യതയിലും ഇത് സ്വാധീനം ചെലുത്തും.
