ഫെഡറൽ തിരഞ്ഞെടുപ്പിൽ ലിബറൽ പാർട്ടിയെ രൂക്ഷമായി വിമർശിച്ചിരുന്നെങ്കിലും, പാർലമെന്റ് സമ്മേളനം പുനരാരംഭിക്കുമ്പോൾ പ്രധാനമന്ത്രി മാർക്ക് കാർണിയുടെ പ്രധാന നിയമനിർമ്മാണങ്ങൾക്ക് പിന്തുണ നൽകുമെന്ന് കൺസർവേറ്റിവ് പാർട്ടിയുടെ ഹൗസ് ലീഡർ ആൻഡ്രൂ ഷിയർ വ്യക്തമാക്കി. അമേരിക്കൻ പ്രസിഡന്റ് ട്രംപുമായി നിലനിൽക്കുന്ന വ്യാപാര സംഘർഷത്തിൽ കാനഡയുടെ താൽപര്യങ്ങൾ സംരക്ഷിക്കുന്ന നയങ്ങൾക്ക് പൂർണ പിന്തുണയുണ്ടാകുമെന്ന് അദ്ദേഹം ഉറപ്പുനൽകി.
ഒട്ടാവയിലെ ജനറൽ മോട്ടോഴ്സ് പ്ലാന്റ് അടച്ചുപൂട്ടൽ ഉൾപ്പെടെയുള്ള വ്യവസായ മേഖലയിലെ പ്രതിസന്ധികൾ കണക്കിലെടുത്ത്, കാനഡയുടെ സാമ്പത്തിക താൽപര്യങ്ങൾ സംരക്ഷിക്കേണ്ടതിന്റെ ആവശ്യകതയിൽ കൺസർവേറ്റിവുകൾ ഊന്നൽ നൽകുന്നു. ട്രംപുമായുള്ള ആദ്യ കൂടിക്കാഴ്ചയിൽ വ്യാപാര നികുതികൾ പൂർണമായി എടുത്തുകളയുന്നതിനോ അതിനുള്ള വ്യക്തമായ കാലക്രമമോ ഉറപ്പാക്കണമെന്നാണ് അവരുടെ പ്രധാന ആവശ്യം.
ഗുരുതര കുറ്റവാളികൾക്കുള്ള വീട്ടുതടങ്കൽ നിയമങ്ങളിൽ കാർണി പരിഷ്കാരങ്ങൾക്ക് തയ്യാറാകുന്നപക്ഷം, നിയമബില്ലുകളായ C-5, C-75 എന്നിവയിൽ പൂർണ സഹകരണം നൽകാമെന്ന് ഷിയർ അറിയിച്ചു. താൻ പാർട്ടിയുടെ താൽക്കാലിക നേതാവായി മാത്രമാണെന്ന റിപ്പോർട്ടുകൾ നിലനിൽക്കെ, പിയറി പൊയിലീവ്രെ വീണ്ടും പാർലമെന്റിൽ മടങ്ങിവരുമെന്നും അവരുടെ നേതൃത്വത്തിലായിരിക്കും പാർട്ടി മുന്നോട്ടുപോവുകയെന്നും അദ്ദേഹം വ്യക്തമാക്കി.
