സ്വർണ്ണം പോലെ വിലപിടിപ്പുള്ള ഭാരമുള്ള മൂലകങ്ങൾ എങ്ങനെ ബ്രഹ്മാണ്ഡത്തിൽ ഉണ്ടായി എന്ന ചോദ്യത്തിന് പുതിയ ഉത്തരം ലഭിച്ചിരിക്കുന്നു. ന്യൂട്രോൺ നക്ഷത്രങ്ങളുടെ കൂട്ടിമുട്ടലുകളിൽ (കിലോനോവ) നിന്നാണ് ഇവ ഉണ്ടാകുന്നതെന്ന് ഇത്രകാലം കരുതിയിരുന്നെങ്കിലും, ‘മാഗ്നെറ്റർ’ എന്ന അതിശക്തമായ കാന്തികമണ്ഡലമുള്ള ന്യൂട്രോൺ നക്ഷത്രങ്ങളിൽ നിന്നുള്ള വൻ ജ്വാലകളും ഈ മൂലകങ്ങളുടെ സൃഷ്ടിയിൽ പങ്കുവഹിക്കുന്നുവെന്ന് കോളംബിയ സർവകലാശാലയിലെ ശാസ്ത്രജ്ഞർ കണ്ടെത്തിയിരിക്കുന്നു.
നാസയും യൂറോപ്യൻ ബഹിരാകാശ ഏജൻസിയും ശേഖരിച്ച പഴയ ഡാറ്റയുടെ വിശകലനത്തിലൂടെയാണ് ഈ നിർണായക കണ്ടെത്തൽ ഉണ്ടായത്. പൊട്ടിത്തെറിച്ച നക്ഷത്രങ്ങളുടെ അപൂർവ അവശിഷ്ടങ്ങളായ മാഗ്നെറ്ററുകൾ, അവയുടെ ഉപരിതലത്തിലെ സമ്മർദ്ദം മൂലമുണ്ടാകുന്ന നക്ഷത്രഭൂകമ്പങ്ങൾക്കും അതിശക്തമായ ജ്വാലകൾക്കും പേരുകേട്ടവയാണ്. 2004-ൽ സംഭവിച്ച അത്തരമൊരു സ്ഫോടനത്തിനിടെ INTEGRAL ദൗത്യം രേഖപ്പെടുത്തിയ സിഗ്നലുകൾ, സ്വർണ്ണം പോലുള്ള ഭാരമേറിയ മൂലകങ്ങളുടെ നിർമ്മാണത്തിനു പറ്റിയ സാഹചര്യങ്ങളെ സൂചിപ്പിക്കുന്ന സൈദ്ധാന്തിക മോഡലുകളുമായി അത്ഭുതകരമായി യോജിക്കുന്നതായി ഗവേഷകർ കണ്ടെത്തി.
നാസയുടെ RHESSI, Wind ഉപഗ്രഹങ്ങളിൽ നിന്നുള്ള കൂടുതൽ വിവരങ്ങളും ഈ കണ്ടെത്തലിനെ ശക്തിപ്പെടുത്തി. ഗവേഷണ സംഘത്തിന്റെ നേതാവായ അനിരുദ്ധ് പട്ടേൽ പറയുന്നതനുസരിച്ച്, മാഗ്നെറ്റർ സ്ഫോടനങ്ങൾ നമ്മുടെ ക്ഷീരപഥത്തിലെ ഭാരമേറിയ മൂലകങ്ങളുടെ 10% വരെ ഉത്പാദിപ്പിക്കുന്നുണ്ടാകാം. എന്നാൽ ഈ കണ്ടെത്തലിനെക്കുറിച്ച് എല്ലാ ശാസ്ത്രജ്ഞരും ഒരേ അഭിപ്രായക്കാരല്ല. 2017-ലെ ന്യൂട്രോൺ നക്ഷത്ര കൂട്ടിമുട്ടൽ പഠനത്തിന് നേതൃത്വം നൽകിയ ഡോ. എലിയനോറ ട്രോജ പുതിയ തെളിവുകൾ തികച്ചും അപര്യാപ്തമാണെന്നും മാഗ്നെറ്ററുകൾ പലപ്പോഴും ലഘുലോഹങ്ങൾ മാത്രമേ ഉത്പാദിപ്പിക്കുന്നുള്ളൂവെന്നും ചൂണ്ടിക്കാട്ടുന്നു. 2027-ൽ നാസ വിക്ഷേപിക്കാൻ പോകുന്ന COSI ദൗത്യം ഈ വിഷയത്തിൽ കൂടുതൽ വ്യക്തത വരുത്തുമെന്ന് പ്രതീക്ഷിക്കപ്പെടുന്നു.
