ആൽബർട്ട : ആൽബർട്ടയിലെ യോഗ്യതയുള്ള വോട്ടർമാരിൽ നാലിൽ ഒരാൾ ഫെഡറൽ തിരഞ്ഞെടുപ്പിന് മുമ്പ് മുൻകൂർ വോട്ടിംഗിൽ പങ്കെടുത്തതായി ഇലക്ഷൻസ് കാനഡയുടെ പ്രാഥമിക കണക്കുകൾ വ്യക്തമാക്കുന്നു. 815,000-ലധികം ആളുകൾ അഡ്വാൻസ് പോളിംഗ് സ്റ്റേഷനുകളിൽ വോട്ട് ചെയ്തു, 2021-നെ അപേക്ഷിച്ച് ഏകദേശം 169,000 കൂടുതലാണിത്. കാൽഗറി ക്രോഫൂട്ട് റൈഡിംഗ് കാനഡയിൽ നാലാമത്തെ ഉയർന്ന അഡ്വാൻസ് വോട്ടർ പങ്കാളിത്തം രേഖപ്പെടുത്തി.
ദേശീയതലത്തിൽ, ഏകദേശം 7.3 മില്യൺ കനേഡിയൻ പൗരന്മാർ നേരത്തെ വോട്ട് ചെയ്തു, ഇത് ഒരു പുതിയ റെക്കോർഡാണ്. ഈസ്റ്റർ വീക്കെൻഡിൽ അഡ്വാൻസ് പോളുകൾ തുറന്നിരുന്നതും, മുൻകൂർ വോട്ടിംഗിലേക്കുള്ള പൊതുവായ പ്രവണതയും ഈ വർധനവിന് കാരണമായിട്ടുണ്ടാകാം. എന്നിരുന്നാലും, ഉയർന്ന അഡ്വാൻസ് വോട്ടർ പങ്കാളിത്തം മൊത്തം വോട്ടർ പങ്കാളിത്തത്തെ അനിവാര്യമായി പ്രവചിക്കുന്നില്ലെന്ന് വിദഗ്ധർ മുന്നറിയിപ്പ് നൽകുന്നു.
“ഇത്തവണത്തെ ഉയർന്ന മുൻകൂർ വോട്ടിംഗ് നിരക്ക് വോട്ടർമാരുടെ ആവേശത്തെയും തിരഞ്ഞെടുപ്പിനോടുള്ള താൽപര്യത്തെയും സൂചിപ്പിക്കുന്നു,” എന്ന് ഇലക്ഷൻസ് കാനഡയുടെ മുതിർന്ന വിശകലന വിദഗ്ധൻ ആയ മാർക്ക് ജോൺസൺ പറഞ്ഞു. “എന്നാൽ, ഇത് കൂടുതൽ ആളുകൾ വോട്ട് ചെയ്യുന്നുവെന്നല്ല, മറിച്ച് അവർ വോട്ട് ചെയ്യുന്ന രീതിയിൽ വന്ന മാറ്റമാണ് സൂചിപ്പിക്കുന്നത്.”എന്നും അദ്ദേഹം വ്യക്തമാക്കി.
സൗത്ത് ആൽബർട്ടയിലും കാൽഗറിയിലും പ്രത്യേകിച്ച് നഗരപ്രദേശങ്ങളിൽ ഉയർന്ന പങ്കാളിത്തം രേഖപ്പെടുത്തി. അതേസമയം, ലേക്ക്ലാൻഡ് പോലുള്ള ഗ്രാമീണ റൈഡിംഗുകളിൽ വളരെ കുറഞ്ഞ പങ്കാളിത്തമാണ് കണ്ടത്. ലിബറലുകളും കൺസർവേറ്റീവുകളും തമ്മിലുള്ള കടുത്ത മത്സരം കൂടുതൽ ആളുകളെ നേരത്തെ വോട്ട് ചെയ്യാൻ പ്രേരിപ്പിച്ചിട്ടുണ്ടാകാം.തിങ്കളാഴ്ചയാണ് തിരഞ്ഞെടുപ്പ് ദിനം, രാവിലെ 7:30 മുതൽ വൈകുന്നേരം 7:30 വരെ പോളിംഗ് സ്റ്റേഷനുകൾ തുറന്നിരിക്കും.
