അൽബർട്ടയിലെ വാട്ടർട്ടൺ ലേക്സ് ദേശീയോദ്യാനത്തിൽ ശാസ്ത്രജ്ഞർ പുതിയൊരു ചിത്രശലഭ ഇനം കണ്ടെത്തിയിരിക്കുന്നു. സാറ്റിറിയം ക്യൂരിയോസോലസ് എന്ന ശാസ്ത്രനാമത്തിൽ അറിയപ്പെടുന്ന “ക്യൂരിയസ്ലി ഐസൊലേറ്റഡ് ഹെയർസ്ട്രീക്” എന്ന ഈ ചിത്രശലഭം, മുമ്പ് ‘ഹാഫ്-മൂൺ ഹെയർസ്ട്രീക്’ ഇനത്തിൽപ്പെട്ടതായി തെറ്റിദ്ധരിക്കപ്പെട്ടിരുന്നു. ബ്ലാകിസ്റ്റൺ ഫാൻ എന്ന 300 ഹെക്ടർ വിസ്തൃതിയുള്ള പ്രെയറി-പുൽമേട് മേഖലയിൽ മാത്രം കാണപ്പെടുന്ന ഈ ഇനം അതിന്റെ അടുത്തകൂട്ടത്തിൽ നിന്ന് 450 കിലോമീറ്ററിലധികം അകലെയാണ് ജീവിക്കുന്നത്.
ZooKeys എന്ന ജേണലിൽ പ്രസിദ്ധീകരിച്ച പഠനത്തിൽ, നൂതന ജീനോമിക് ഉപകരണങ്ങൾ ഉപയോഗിച്ച് ഈ ചിത്രശലഭത്തിന്റെ പൂർണ്ണ ഡി.എൻ.എ സീക്വൻസ് ചെയ്യുകയും അത് ഏകദേശം 40,000 വർഷങ്ങൾക്ക് മുമ്പ് അതിന്റെ കൂട്ടത്തിൽ നിന്ന് വേർപിരിഞ്ഞതായി കണ്ടെത്തുകയും ചെയ്തു. ഈ പുതിയ ഇനം പ്രത്യുൽപ്പാദനത്തിന് വെള്ളിനിറമുള്ള ലൂപ്പൈൻ സസ്യങ്ങളെ ആശ്രയിക്കുന്നു.
പുതിയ ചിത്രശലഭ ഇനത്തിന്റെ സംരക്ഷണത്തിൽ ഗവേഷകർ നേരിടുന്ന പ്രധാന പ്രശ്നം ബ്ലാകിസ്റ്റൺ ഫാനിൽ കാണപ്പെടുന്ന അധിനിവേശ സ്പോട്ടഡ് നാപ്വീഡ് എന്ന കളസസ്യമാണ്. ഇത് ചിത്രശലഭങ്ങളുടെ ആവാസവ്യവസ്ഥയെ നശിപ്പിക്കുന്നു. ഗവേഷകനായ ഗ്ലാസിയർ പറയുന്നതനുസരിച്ച്, ഈ ചിത്രശലഭങ്ങളെ മനുഷ്യരുടെ സംരക്ഷണത്തിൽ വളർത്തി പിന്നീട് അവയുടെ സ്വാഭാവിക ആവാസവ്യവസ്ഥയിലേക്കോ പാർക്കിലെ മറ്റു യോജിച്ച സ്ഥലങ്ങളിലേക്കോ വിടുന്ന പദ്ധതി ആലോചിക്കുന്നുണ്ട്.
