ആരോഗ്യ മേഖലയിലെ കേരളത്തിന്റെ ശ്രദ്ധേയമായ നേട്ടങ്ങൾക്ക് ഒരിക്കൽ കൂടി അംഗീകാരം. സംസ്ഥാനത്തെ ശിശുമരണ നിരക്ക് ഓരോ 1000 കുഞ്ഞുങ്ങളിലും അഞ്ചായി കുറഞ്ഞതായി ഏറ്റവും പുതിയ ഔദ്യോഗിക റിപ്പോർട്ടുകൾ വ്യക്തമാക്കുന്നു. ഇത് അമേരിക്കൻ ഐക്യനാടുകളിലെ ശിശുമരണ നിരക്കിനേക്കാൾ കുറവാണെന്നതാണ് ഈ നേട്ടത്തിന്റെ ഏറ്റവും വലിയ പ്രത്യേകത.
സാംപിൾ രജിസ്ട്രേഷൻ സിസ്റ്റം (എസ്ആർഎസ്) സ്റ്റാറ്റിസ്റ്റിക്കൽ റിപ്പോർട്ട്-2023 അനുസരിച്ചാണ് ഈ കണക്കുകൾ പുറത്തുവന്നത്. രാജ്യത്തെ ശരാശരി ശിശുമരണ നിരക്ക് 1000-ൽ 25 ആയിരിക്കുമ്പോൾ, കേരളം ഈ നേട്ടം കൈവരിച്ചത് ആരോഗ്യമേഖലയിൽ നടത്തിയ നിരന്തരമായ പരിശ്രമങ്ങളുടെ ഫലമായാണ്. 2022-ലെ കണക്കനുസരിച്ച് അമേരിക്കയിലെ ശിശുമരണ നിരക്ക് 1000-ൽ 5.6 ആയിരുന്നു. ഇത് കേരളത്തിന്റെ നിലവിലെ നിരക്കിനേക്കാൾ ഉയർന്നതാണ്.
ഈ വിഷയത്തിൽ ആരോഗ്യമന്ത്രി വീണാ ജോർജ് സംസാരിക്കവെ, കേരളത്തിന്റെ ഈ നേട്ടം രാജ്യത്തിന് തന്നെ മാതൃകയാണെന്ന് ചൂണ്ടിക്കാട്ടി. ഇന്ത്യയിൽ നഗര-ഗ്രാമ മേഖലകളിൽ ശിശുമരണ നിരക്കിൽ വലിയ വ്യത്യാസമുണ്ട്. ഗ്രാമങ്ങളിൽ 1000-ൽ 28-ഉം നഗരങ്ങളിൽ 1000-ൽ 19-ഉം ആണ് ശരാശരി നിരക്ക്. എന്നാൽ കേരളത്തിൽ ഈ വ്യത്യാസമില്ല എന്നത് ആരോഗ്യ സേവനങ്ങൾ എല്ലാവർക്കും ഒരുപോലെ ലഭ്യമാണെന്നതിന്റെ തെളിവാണെന്ന് മന്ത്രി പറഞ്ഞു.
വർഷങ്ങളായി ആരോഗ്യമേഖലയിൽ നടത്തിയ സുസ്ഥിരമായ ഇടപെടലുകളാണ് കേരളത്തിന് ഈ നേട്ടം കൈവരിക്കാൻ സഹായകമായത്. സംസ്ഥാന സാമ്പത്തിക, സ്റ്റാറ്റിസ്റ്റിക്സ് വകുപ്പിന്റെ കണക്കനുസരിച്ച്, 2010-ൽ 1000-ൽ 7.42 ആയിരുന്ന ശിശുമരണ നിരക്ക് 2012-ൽ 8.2 ആയി ഉയർന്നതിനു ശേഷം ഘട്ടം ഘട്ടമായി കുറഞ്ഞുവരികയായിരുന്നു.
2023-ലെ സംസ്ഥാനത്തിന്റെ സുപ്രധാന സ്ഥിതിവിവരക്കണക്കുകൾ പ്രകാരം, കേരളത്തിൽ ഗ്രാമ-നഗര മേഖലകളിലെ ഭൂരിഭാഗം പ്രസവങ്ങളും ആശുപത്രികളിലാണ് നടക്കുന്നത്.
ഗ്രാമങ്ങളിൽ 96.16 ശതമാനവും നഗരങ്ങളിൽ 99.88 ശതമാനവും പ്രസവങ്ങൾ ആശുപത്രികളിൽ നടന്നു. എന്നിരുന്നാലും, വൈദ്യസഹായം ലഭ്യമായിട്ടും, ഗ്രാമപ്രദേശങ്ങളിൽ 1.37 ശതമാനവും നഗരങ്ങളിൽ 0.01 ശതമാനവും പ്രസവങ്ങൾ ഇപ്പോഴും പരമ്പരാഗത രീതിയിലുള്ള പരിചരണത്തിലൂടെയാണ് നടക്കുന്നത്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Kerala No. 1: Infant mortality rate lower than the US
