നോവ സ്കോഷ്യ: നോവ സ്കോഷ്യയിൽ ശമ്പള വർദ്ധനവ് ആവശ്യപ്പെട്ട് നഴ്സിംഗ് ഹോം ജീവനക്കാർ ശക്തമായ പണിമുടക്കിലേക്ക് നീങ്ങുന്നു. കനേഡിയൻ യൂണിയൻ ഓഫ് പബ്ലിക് എംപ്ലോയീസിൽ അംഗങ്ങളായ 22 നഴ്സിംഗ് ഹോമുകളിലെ രണ്ടായിരത്തി ഇരുന്നൂറോളം ജീവനക്കാരാണ് തിങ്കളാഴ്ച രാവിലെ ഏഴ് മണി മുതൽ സമരരംഗത്തിറങ്ങുന്നത്. മാന്യമായ ജീവിതസാഹചര്യത്തിന് ആവശ്യമായ വേതനം ഉറപ്പാക്കണമെന്നും 2023-ൽ കാലാവധി കഴിഞ്ഞ കരാറുകൾ അടിയന്തരമായി പുതുക്കണമെന്നുമാണ് യൂണിയന്റെ പ്രധാന ആവശ്യം.
ജീവനക്കാർക്ക് അർഹമായ വേതനം നൽകുന്നതിൽ സർക്കാർ പരാജയപ്പെട്ടതിനാലാണ് ഇത്തരമൊരു കടുത്ത തീരുമാനത്തിലേക്ക് നീങ്ങേണ്ടി വന്നതെന്ന് യൂണിയൻ വക്താവ് ടൈ ലോപ്പി വ്യക്തമാക്കി. ആദ്യഘട്ടത്തിൽ 22 കെയർ ഹോമുകളെയാണ് സമരം ബാധിക്കുന്നതെങ്കിലും വരും ദിവസങ്ങളിൽ കൂടുതൽ കേന്ദ്രങ്ങളിലേക്ക് പ്രതിഷേധം വ്യാപിക്കാനാണ് സാധ്യത. ഇത് നോവ സ്കോഷ്യയിലെ ആരോഗ്യ-പരിചരണ മേഖലയിൽ വലിയ പ്രതിസന്ധിയുണ്ടാക്കുമെന്ന് കരുതപ്പെടുന്നു.
അതേസമയം സമരം വലിയ വെല്ലുവിളിയാണെങ്കിലും നഴ്സിംഗ് ഹോമുകളിലെ അന്തേവാസികളുടെ സുരക്ഷയ്ക്കാണ് തങ്ങൾ മുൻഗണന നൽകുന്നതെന്ന് നോവ സ്കോഷ്യ ലോംഗ് ടേം കെയർ മന്ത്രി ബാർബറ ആഡംസ് അറിയിച്ചു. അത്യാവശ്യ സേവനങ്ങൾ തടസ്സപ്പെടാതിരിക്കാൻ പ്രത്യേക ക്രമീകരണങ്ങൾ ഏർപ്പെടുത്തിയിട്ടുണ്ടെന്ന് സർക്കാർ വ്യക്തമാക്കിയെങ്കിലും പ്രിയപ്പെട്ടവരുടെ പരിചരണത്തെക്കുറിച്ച് കുടുംബാംഗങ്ങൾ വലിയ ആശങ്കയിലാണ്. ശമ്പള കാര്യത്തിൽ സർക്കാരും ജീവനക്കാരും തമ്മിലുള്ള ചർച്ചകൾ അനിശ്ചിതത്വത്തിലായതാണ് ഈ തൊഴിൽ സമരത്തിന് വഴിവെച്ചത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
2,200 workers from 22 Nova Scotia long-term care homes expected to strike
