ന്യൂ ഡൽഹി: വികസിത് ഭാരത് 2047 എന്ന ലക്ഷ്യത്തിലേക്ക് ചുവടുവെച്ച് 2026-ഓടെ രാജ്യം വൻ വികസന കുതിപ്പിന് തയ്യാറെടുക്കുന്നു. ബുള്ളറ്റ് ട്രെയിൻ, വ്യോമയാന വിപുലീകരണം, ആണവോർജം തുടങ്ങിയ മേഖലകളിൽ നിർണായക ചുവടുവെപ്പുകളാണ് കേന്ദ്ര സർക്കാർ ലക്ഷ്യമിടുന്നത്. പ്രധാന അടിസ്ഥാന സൗകര്യ വികസനത്തിനും സാങ്കേതിക മുന്നേറ്റത്തിനുമായി അഞ്ച് വർഷത്തെ സെക്ടറൽ ആക്ഷൻ പ്ലാനുകൾ വരാനിരിക്കുന്ന ബജറ്റിൽ ഉൾപ്പെടുത്തുമെന്ന് സർക്കാർ അറിയിച്ചു.
ആണവോർജ രംഗത്ത് സ്വയംപര്യാപ്തത കൈവരിക്കുക എന്ന ലക്ഷ്യത്തോടെ 20,000 കോടി രൂപയുടെ ന്യൂക്ലിയർ എനർജി മിഷനാണ് രൂപം നൽകിയിരിക്കുന്നത്. ഇതിന്റെ ഭാഗമായി സ്മോൾ മോഡുലാർ റിയാക്ടറുകൾ (SMRs) വികസിപ്പിക്കും. 2033-ഓടെ ഇന്ത്യയിൽ തന്നെ രൂപകൽപ്പന ചെയ്ത അഞ്ച് എസ്.എം.ആറുകൾ പ്രവർത്തനക്ഷമമാക്കാനാണ് ലക്ഷ്യമിടുന്നത്. ഇതിനായുള്ള ഗവേഷണ പ്രവർത്തനങ്ങളിൽ 2026 ഏറ്റവും നിർണായക വർഷമായിരിക്കുമെന്ന് അധികൃതർ വ്യക്തമാക്കി.
സാധാരണക്കാർക്കും വിമാനയാത്ര സാധ്യമാക്കുന്ന ഉഡാൻ (UDAN) പദ്ധതിയുടെ വിപുലീകരണമാണ് വ്യോമയാന മേഖലയിലെ പ്രധാന ലക്ഷ്യം. അടുത്ത പത്ത് വർഷത്തിനുള്ളിൽ 120 പുതിയ നഗരങ്ങളിലേക്ക് സർവീസ് വ്യാപിപ്പിക്കുകയും നാല് കോടി അധിക യാത്രക്കാരെ ലക്ഷ്യമിടുകയും ചെയ്യുന്നു. മലയോര മേഖലകളിലും വടക്കുകിഴക്കൻ സംസ്ഥാനങ്ങളിലും കണക്റ്റിവിറ്റി വർദ്ധിപ്പിക്കുന്നതിനായി കൂടുതൽ ഹെലിപാഡുകൾ സ്ഥാപിക്കാനും പദ്ധതിയുണ്ട്.
രാജ്യത്തെ ആദ്യ ബുള്ളറ്റ് ട്രെയിൻ പദ്ധതിയായ മുംബൈ-അഹമ്മദാബാദ് പാതയുടെ നിർമ്മാണം 2026-ഓടെ സുപ്രധാന ഘട്ടത്തിലെത്തും. ഗുജറാത്തിലെ സൂറത്തിനും ബിലിമോറയ്ക്കും ഇടയിലുള്ള 100 കിലോമീറ്റർ ദൂരം ഈ വർഷം തന്നെ പൂർത്തിയാക്കാനാണ് റെയിൽവേയുടെ തീരുമാനം. കൂടാതെ, 2030-ഓടെ ചരക്ക് ഗതാഗതത്തിന്റെ വിഹിതം 45 ശതമാനമായി ഉയർത്തുന്നതിനും കപ്പൽ നിർമ്മാണ രംഗത്തിനായി 25,000 കോടി രൂപയുടെ മാരിടൈം ഡെവലപ്മെന്റ് ഫണ്ട് രൂപീകരിക്കുന്നതിനും സർക്കാർ മുൻഗണന നൽകുന്നു.
ഈ സ്വപ്ന പദ്ധതികൾക്ക് പുറമെ ജൽജീവൻ മിഷൻ, നാഷണൽ മാനുഫാക്ചറിങ് മിഷൻ എന്നിവയുടെ രണ്ടാം ഘട്ട പ്രവർത്തനങ്ങളും ഊർജിതമാക്കും. വിദ്യാഭ്യാസം, ആരോഗ്യം, ഡിജിറ്റൽ അടിസ്ഥാന സൗകര്യങ്ങൾ എന്നിവയ്ക്ക് ഊന്നൽ നൽകിക്കൊണ്ടുള്ള പദ്ധതികൾ വികസിത് ഭാരത് ലക്ഷ്യത്തിലേക്കുള്ള ഇന്ത്യയുടെ യാത്ര വേഗത്തിലാക്കുമെന്ന് സർക്കാർ അധികാരികൾ അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt
From nuclear power to high-speed rail: 2026 is India’s year of development
