ന്യൂയോർക്ക്: ലോകമെമ്പാടുമുള്ള സ്ത്രീകളുടെ സുരക്ഷയെക്കുറിച്ച് ഞെട്ടിക്കുന്ന വിവരങ്ങളുമായി ഐക്യരാഷ്ട്രസഭയുടെ പുതിയ റിപ്പോർട്ട്. വീട്ടിലും പുറത്തും സ്ത്രീകൾ നേരിടുന്ന കൊലപാതകങ്ങളുടെ കണക്കുകളാണ് യുഎൻ പുറത്തുവിട്ടിരിക്കുന്നത്. ലോകത്ത് ഓരോ പത്ത് മിനിറ്റിലും ഒരു സ്ത്രീയോ പെൺകുട്ടിയോ അവരുടെ സ്വന്തം പങ്കാളിയാലോ കുടുംബാംഗങ്ങളാലോ കൊല്ലപ്പെടുന്നുണ്ടെന്നാണ് റിപ്പോർട്ട് പറയുന്നത്. ഇത് പ്രതിദിനം ശരാശരി 137 കൊലപാതകങ്ങൾക്ക് തുല്യമാണ്.
ഐക്യരാഷ്ട്രസഭയുടെ മയക്കുമരുന്ന്, കുറ്റകൃത്യങ്ങൾക്കായുള്ള ഓഫീസ് (UNODC), യുഎൻ വനിതാ വിഭാഗം എന്നിവ ചേർന്നാണ് ഈ റിപ്പോർട്ട് പുറത്തിറക്കിയത്. കഴിഞ്ഞ വർഷം ലോകമെമ്പാടും 83,000 പെൺകുട്ടികളാണ് കൊലചെയ്യപ്പെട്ടത്. ഇതിൽ 60 ശതമാനം കൊലപാതകങ്ങൾക്കും (ഏകദേശം 50,000 കേസുകൾ) പിന്നിൽ അവരുടെ അടുത്ത പങ്കാളികളോ വീട്ടുകാരോ ആണ്. അതായത്, ലോകത്ത് ഒരു സ്ത്രീ കൊല്ലപ്പെടുമ്പോൾ, ആ കൊലപാതകം മിക്കവാറും വീട്ടിൽവെച്ചോ അടുത്ത ബന്ധുക്കളാലോ ആയിരിക്കും. പുരുഷന്മാരുടെ കാര്യത്തിൽ, പങ്കാളികളോ കുടുംബാംഗങ്ങളോ നടത്തുന്ന കൊലപാതകങ്ങൾ 11 ശതമാനം മാത്രമാണ്.
“പല സ്ത്രീകൾക്കും പെൺകുട്ടികൾക്കും വീട് ഇപ്പോഴും അപകടകരവും ചിലപ്പോൾ മരണകാരണമാകുന്നതുമായ ഒരിടമാണ്,” UNODC എക്സിക്യൂട്ടീവ് ഡയറക്ടർ ജോൺ ബ്രാൻഡോളിനോ പറഞ്ഞു. സ്ത്രീകൾക്കെതിരായ ഈ അക്രമങ്ങൾ തടയാൻ രാജ്യങ്ങൾ പ്രതിരോധ സംവിധാനങ്ങൾ മെച്ചപ്പെടുത്തണമെന്നും കുറ്റവാളികൾക്ക് കഠിന ശിക്ഷ ഉറപ്പാക്കണമെന്നും യുഎൻ ആവശ്യപ്പെടുന്നു. കൂടാതെ, ഓൺലൈനിൽ നടക്കുന്ന ഭീഷണികളും അക്രമങ്ങളും പലപ്പോഴും സ്ത്രീഹത്യ പോലുള്ള വലിയ കുറ്റകൃത്യങ്ങളിലേക്ക് വഴിവെക്കുന്നുണ്ടെന്നും റിപ്പോർട്ടിൽ പറയുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Women are not safe even at home! 137 killed every day; UN report
