ക്യൂബെക്കിന്റെ സംസ്ക്കാരവും മൂല്യങ്ങളും അംഗീകരിക്കാത്തവർക്ക് പൗരത്വം നിഷേധിക്കുമെന്ന് മുന്നറിയിപ്പ്
ക്യൂബെക്കിലെ കോലിഷൻ അവേനിർ ക്യൂബെക് (CAQ) സർക്കാർ കുടിയേറ്റക്കാരെ നിയന്ത്രിക്കുന്നതിനായി പുതിയ നിയമനിർമ്മാണം കൊണ്ടുവരുന്നു. ലിംഗസമത്വം, മതനിരപേക്ഷത, ഫ്രഞ്ച് ഭാഷയുടെ സംരക്ഷണം തുടങ്ങിയ ‘പൊതു മൂല്യങ്ങൾ’ അംഗീകരിക്കാത്ത കുടിയേറ്റക്കാർക്ക് നിയന്ത്രണങ്ങൾ ഏർപ്പെടുത്തുന്ന ബിൽ വലിയ വിവാദമായിരിക്കുകയാണ്.
ഫെസ്റ്റിവലുകൾ പോലുള്ള പൊതു പരിപാടികൾക്കുള്ള സർക്കാർ ധനസഹായം ക്യൂബെക്കിന്റെ പൊതു സംസ്കാരത്തെ പ്രോത്സാഹിപ്പിക്കുന്നതുമായി ബന്ധപ്പെടുത്തുമെന്ന വാർത്ത മുനിസിപ്പാലിറ്റികളുടെ എതിർപ്പിന് കാരണമായിട്ടുണ്ട്. ഇത് പ്രാദേശിക സ്വയംഭരണത്തിന്റെ അവകാശങ്ങളിൽ കൈകടത്തുന്നതായി അവർ ആരോപിക്കുന്നു.
കുടിയേറ്റക്കാർക്ക് സ്വന്തം സാംസ്കാരിക അടയാളങ്ങൾ ഉപേക്ഷിക്കേണ്ടി വരുമെന്ന ആശങ്ക പ്രകടിപ്പിച്ച് മനുഷ്യാവകാശ സംഘടനകൾ രംഗത്തുവന്നിട്ടുണ്ട്. ലീഗ് ദെസ് ഡ്രോയിറ്റ്സ് എറ്റ് ലിബർട്ടസ് ഉൾപ്പെടെയുള്ള സംഘടനകൾ ഈ നിയമം മതസ്വാതന്ത്ര്യത്തിനും അഭിപ്രായ സ്വാതന്ത്ര്യത്തിനും വിരുദ്ധമാണെന്ന് വാദിക്കുന്നു.
ആംഗ്ലോഫോൺ സമൂഹം ഈ നിയമം ക്യൂബെക്കിന്റെ സംസ്കാരത്തെ പ്രധാനമായും ഫ്രഞ്ച് ഭാഷയുമായി മാത്രം ബന്ധപ്പെടുത്തി അവരുടെ ചരിത്രത്തെ മായ്ച്ചുകളയുന്നുവെന്ന് ആശങ്കപ്പെടുന്നു. മാർച്ച് 18-ന് നിയമനിർമ്മാണ ഹിയറിംഗുകൾ പുനരാരംഭിക്കും.
